Sipas një studimi të kryer në Australi, fëmijët po ekspozohen dy herë më shumë ndaj reklamave për ushqim të pashëndetshëm sesa reklamat e ushqimit të shëndetshëm në TV.
Hulumtuesit gjithashtu zbuluan se reklamat për ushqime të pashëndetshme ishin më të përhapura kur fëmijët e shikonin televizorin në krahasim me herët e tjera të transmetimit. Hulumtimi nga Universiteti i Adelaide u publikua të martën në Journal of Pediatrics and Child Health dhe u sponsorizua nga Heart Foundation, transmeton koha.net.
Ata e ekzaminuan një vit të transmetimit televiziv dhe reklamave nga një rrjet televiziv falas në Australinë e Jugut në vitin 2016. Kjo i përfshiu 30,000 orë program televiziv që përmbante më shumë se 500 orë reklama ushqimore - 100,000 reklama ushqimore. Artikujt më të shpeshtë ishin ushqimet e lehta (snacks), mishrat e grira dhe të rrahura, ushqimet e shpejta dhe pijet me sheqer.
Ata zbuluan se fëmijët do t’i shikonin më shumë se 800 reklama të ushqimit të pashëndetshëm në vit nëse i shikonin 80 minuta televizion në ditë.
"Këto janë të dhënat më solide që i kemi parë kudo," tha dr. Lisa Smithers, profesoreshë e asociuar në Adelaide në një njoftim për shtyp. "Ky është grupi më i madh i të dhënave i përdorur ndonjëherë nga hulumtuesit shëndetësorë për shqyrtimin e reklamave ushqimore në Australi dhe ndoshta në botë. Shumica e hulumtimeve në këtë fushë bazohen vetëm në disa ditë të të dhënave dhe nuk ka studime australiane që e marrin parasysh sezonalitetin".
Studiuesit zbuluan se reklamimi i ushqimit të pashëndetshëm ishte 2.3 herë më i shpeshtë çdo orë se sa reklamimi i ushqimit të shëndetshëm gjatë kohës së shikueshmërisë më të lartë prej fëmijëve.
Reklamimi varioi gjatë kohëve të vitit - 71 për qind e të gjitha reklamave ushqimore në janar gjatë pushimeve verore kur fëmijët në Australi nuk e vijojnë mësimin krahasuar me 41 për qind të të gjitha reklamave ushqimore në gusht.
Në Shtetet e Bashkuara, reklamat e ushqimit e përbëjnë gati gjysmën e të gjitha mesazheve komerciale në programet e fëmijëve, sipas Instituteve Kombëtare të Shëndetit. Një orë mesatare i përfshin 11 reklama ushqimore që e përbëjnë 4 minuta dhe 25 sekonda të kohës totale të reklamimit.
Iniciativa për Reklamimin e Ushqimit dhe Pijeve të Fëmijëve është një program vullnetar i vetë-rregullimit i administruar nga Better Business Bureau, me standarde të forta për reklamimin e ushqimit për fëmijët. Ata kanë përfshirë që pjesëmarrësve të iniciativës t’u kërkohet që të reklamojnë për fëmijët nën 12 vjeç vetëm ushqime që i plotësojnë kriteret uniforme të ushqyerjes në media.
Kompanitë përfshijnë McDonald's, Burger King, Coca-Cola, Kellogg, Post, Nestle, Unilever, Hershey, Campbell’s, KraftHeinz, Mars, General Mills.
Në Australi, reklamimi gjatë programeve televizive të fëmijëve mbulohet nga Standardet e Televizionit të Fëmijëve.
"Problemet në lidhje me dietën janë shkaku kryesor i sëmundjeve në Australi dhe Organizata Botërore e Shëndetësisë ka arritur në përfundimin se marketingu i ushqimit ndikon në llojet e ushqimeve që fëmijët preferojnë t’i hanë, të cilat ua kërkojnë prindërve dhe në fund edhe i konsumojnë", tha Smithers.
Ajo shtoi: "Do të doja që rezultatet e hulumtimit tonë ta luajnë një rol në mbrojtjen e fëmijëve nga efektet e reklamimit të ushqimit të pashëndetshëm."
Norvegjia i ndalon reklamat për ushqim të pashëndetshëm ndërsa Franca kërkon mesazhe të ngrënies së shëndetshme kur ushqimet e pashëndetshme reklamohen, sipas studiuesve.
{gallery}
-
27 qershor 2018 18:21
-
Shpërndaje në: