Një gjarpër është gjetur në një avion, i cili po fluturonte për në Anchorage të Alaskës.

Ai kishte mbetur brenda bordit të avionit gjatë një fluturimi paraprak, pasi i kishte humbur një pasagjeri, i cili e kishte njoftuar rastin.

Pasagjerët nuk ishin në dijeni se aty ndodhej një gjarpër, derisa piloti i njoftoi:

“Njerëz, ne kemi një gjarpër në avion, por nuk e dimë ku është”.

Gjarpri i verdhë një metër e gjysmë nuk ishte helmues, dhe u vu re nga një djalë i cili ishte ulur ngjitur me vendin ku ndodhej kafsha, shkruan BBC.

Kur ai e pa, gjarpri ishte në gjumë dhe pjesërisht i mbuluar nga një çantë shpine në afërsi të pjesës së pasme të avionit. Sipas nënës së djalit që e zbuloi, Anna McConnaughy, nuk kishte shumë panik në bord.

Ajo shpjegoi që një pilot ka diskutuar me një mjek për të gjetur mënyrën e kapjes së tij.

Stafi më pas ka kapur gjarprin nga barku dhe është vendosur në një qese të plastikës të mbeturinave.