Mevlyde Gashi,42 vjeçare, gatimin e bakllavasë e ka pasion dhe profesion. Pasionin e trashëgoi nga familja, ndërsa ka tash e 8 vjet që e ka kthyer këtë punë në një burim ekzistence. Por, si çdo biznes tjetër, edhe biznesi i Mevlydes është prekur nga pandemia.
Ajo ëmbëlsirën që di ta bëjë më së miri, e bën edhe për të tjerët përmes porosive.
Nuk i duhen shumë përbërës për ta përgatitur një bakllava, por për ta përfunduar i duhet mjaft kohë.
E vezët që i duhen për brumin pëlqen t’i ketë gjithmonë nga fshati, raporton KOHA.
Qëkur kishte qenë e vogël kishte mësuar se si bëhej përgatitja e ëmbëlsirës më të veçantë në tryezën e festës së Bajramit, bakllavasë, pa të cilën festa nuk ka lezet.
Thotë se nuk e ka ndërruar mënyrën e të përgatiturit dhe se ruan recetën e gjyshes dhe së ëmës.
Vendin ku aktualisht po punon dikur e kishin shfrytëzuar për punë furre, por ky biznes familjar nuk u eci.
E, po atë vend tani po e shfrytëzon vetëm për përgatitjen e kësaj ëmbëlsire.
I duhen përgjithësisht 5 orë të plota për përgatitjen e një bakllavaje, nga fillimi e deri te pjekja.
80 peta thotë se janë më se të mjaftueshme për ta përfunduar. Këtë praktikë po e pëlqejnë edhe klientët e saj.
Puna e saj nuk do të ishte e lehtë pa bashkëshortin e saj, për të cilin Mevlydja thotë se i ka ndihmuar madje edhe në përgatitjen e brumit dhe shtrimin e petëve.
Ajo është nënë e dy fëmijëve, të cilët po ashtu njëjtë kanë trashëguar pasionin për gatim.
Periudha e pandemisë ka prekur edhe të ardhurat e Mevlydes.
Ajo thotë se në festat e dikurshme kërkesat për bakllava ishin më të mëdha dhe vendi ku përgatiste ishte i stërmbushur me tepsi bakllavaje.
Për shkak të pandemisë, festa e Bajramit këtë vit ka qenë më ndryshe.
E, edhe shkuarja për vizitë te të afërmit, siç bëhej më parë, ka qenë e kufizuar.
-
25 maj 2020 10:54
-
Shpërndaje në: