“Peshkim për plastikë”, në plazhet e Italisë

“Peshkim për plastikë”, në plazhet e Italisë

08 June 2019 11:40

Gjatë javëve të fundit në Itali, shumë balena janë gjetur me stomaqe plot me plastikë.

Plastika në det po kërcënon ekosistemin marin, me peshkatarët që e gjejnë veten në vijën e parë të frontit.

Në San Benedetto del Tronto, ata po marrin pjesë në një eksperiment njëmujor “Fishing for Plastic”, që do t’i shohë ata të nxjerrin në tokë mbetjet plastike që kapin në rrjetat e tyre, e jo t’i hedhin mbeturinat sërish në det.

Image

“Nuk ka pasur asnjë njeri në tokë që të merrte plastikën. Tani dikush doli me këtë ide të jashtëzakonshme dhe ne shpresojmë që kjo praktikë të vazhdojë”, tha Claudio Uriani.

Peshkatarët dalin herët në mëngjes për peshkim, pa zbardhur ende dita. E kur ngrenë rrjetat, më shumë sesa peshk gjejnë mbetje plastike.

“Ne pamë fotot e balenave të ngordhura në plazh. Ishin 3 vetëm kohët e fundit, me stomaqet plot plastikë. Kjo i trondit njerëzit dhe e bën të gjithë botën të shohë atë që specialistët kanë vite që e thonë, për sasinë e madhe të plastikës në det që ka arritur në nivele alarmante”, tha Eleonora De Sabata, koordinatore e “Fishing for Plastic”.

Sipas këtyre peshkatarëve, mbetjet që përfundojnë në det vijnë të gjitha nga njerëzit, nga liqenet apo lumenjtë, përcjell RTSH.

Ndaj vëmendja kryesore duhet të përqendrohet tek edukimi i njerëzve. Atyre duhet t’iu tregohet se, ajo që ata hedhin në ujë përfundon në det, e më pas arrin madje edhe në tryezat e çdo shtëpie.

Komentet

Shto koment

Të ngjashme