Regjisori nga Kosova, Ben Apolloni sot do të prezantojë shfaqjen “Plaçkitësit” para publikut kumanovar. Shfaqja “Plaçkitësit” sipas Joe Orton shfaqet më 16 janar, sot në Teatrin e Kumanovës, në fillim prej ora 20:00.
Edhe pse “Plaçkitësit” trajton momente të hidhura dhe tragjike jetësore, në stilin teatror paraqet komedi e zezë.
““Plaçkitësit” është një komedi e zezë me plot kuptimin e fjalës, sepse ndodhë në ditë funerali, në një ditë kur familjarët e të vdekurës do të duhej të ishin duke mbajtur zi, por ata në atë ditë i bëjnë të gjitha të zezat, duke mos pasur pikë respekti për të vdekurën. Kjo komedi e mbushur përplot situata e batuta komike, në fakt është shumë e hidhur dhe fshikulluese për njeriun e kohës tonë i cili ka humbur të gjitha vlerat njerëzore. Vlera për të cilat gjithmonë është folur, por duket se kurrë nuk kanë ekzistuar”, u shpreh për Portalb, regjisori Ben Apolloni.
Personazhet e komedisë “Plaçkitësit” në regji të Ben Apollonit dhe ndihmës-regjie Ibër Deari, në skenë do të vijnë nën interpretimin e aktorëve rezidentë të Teatrit të Kumanovës: Sefedin Shabani, Shkëlqim Islami, Ismail Kasumi, Qazmedin Nuredini, Mirsad Abazi, dhe aktores mysafire nga Shkupi, Rabije Alilovska.
Përndryshe, kjo vepër e Joe Orton është konsideruar shumë provokuese dhe ka shkaktuar shumë debat në kohën kur është shfaq për herë të parë (1965).
Në trajtimin regjisorial aktual, në skenën e Teatrit të Kumanovës kjo shfaqje do të jetë provokuese, por jo vetëm më përmbajtjen por edhe si realizim skenik.
-
16 janar 2018 15:05
-
Shpërndaje në: