E inskenuar në vitin 2000 dhe 2013, drama “Trenat” është kthyer para publikut kosovar në skenën e vogël të Teatrit Kombëtar të Kosovës.
Në hapësirën ku publiku ulet përreth skenës, është improvizuar një stacion trenash.
Nën regji të Zana Durakut, me tekst të Haqif Mulliqit, drama e shkruar në kohë lufte, shpërfaq deportimin masiv të shqiptarëve të Kosovës përmes trenave.
Aktorët Shpëtim Selmani e Rabije Kryeziu, në rolin e Venit e Vinit pasqyrojnë pafuqinë e refugjatëve potencialë, raporton “Express” i KTV-së.
Treni i tyre nuk vjen asnjëherë e pritja shndërrohet deri në torturë dhe përdhunim të grave.
Këto momente shoqërohen me muzikën e instrumentistit Xhemajl Gllavica.
Rrëfimi që shpërfaq përjetimet e trishta nganjëherë flet edhe për dashurinë dhe shpresat në gjendje lufte.
Repriza e parë e shfaqjes “Trenat” jepet sonte në skenën e vogël të Teatrit Kombëtar të Kosovës.
-
Nga: Shaban Maxharraj
-
17 dhjetor 2019 22:51
-
Shpërndaje në: