Teatri i operës dhe baletit pa lokacion, Ministria drejt projektit final

Teatri i operës dhe baletit pa lokacion, Ministria drejt projektit final

Shaban Maxharraj Shaban Maxharraj 13 November 2019 15:12

Prishtinë, 13 nëntor – Ministria së Kulturës s’ka plan tjetër për lokacionin e teatrit, operës dhe baletit “Dr. Ibrahim Rugova”. Ani pse Komuna e Prishtinës të hënën mbrëma e ka bërë të qartë se në atë hapësirë afër Fakultetit Teknik pritet të ndërtohen dy objekte të Universitetit të Prishtinës “Hasan Prishtina”, MKRS-ja ka heshtur edhe për këtë ashtu siç po bën për procedurat e përzgjedhjes së projektit ideor. Gazeta ka marrë vesh se Komisioni i themeluar nga MKRS-ja ka përzgjedhur njërin nga tri propozimet e pranuara si projekt ideor. Një gjë e tillë është bërë javën e kaluar, përderisa prezantimi financiar është bërë po javën e kaluar, të premten.

Për situatën e re zyrtarët ministrorë kanë heshtur edhe të martën, por ministri në detyrë i Kulturës, Kujtim Gashi, mohon deklaratat e kryetarit të Prishtinës, Shpend Ahmeti, se nuk e kanë njoftuar kur konkursin për projekt ideor, në korrik të këtij viti, e kanë hapur duke u bazuar në lokacionin ku dhjetë vjet më parë qe vendosur guri themeltar për teatrin e operës dhe baletit.

Të hënën mbrëma planet për ndërtimin e Fakultetit të Shkencave Matematiko-Natyrore dhe një objekti të Fakultetit Ekonomik janë bërë publike kur Universiteti i Prishtinës “Hasan Prishtina” ia ka bërë Komunës së Prishtinës prezantimin e një drafti të “Planit rregullues të hollësishëm për zonën e ‘Fakultetit Teknik’, në lagjen ‘Bregu i diellit’”. E kryetari i Komunës, Shpend Ahmeti, ka konfirmuar se vendi për teatrin e operës dhe baletit nuk është më i lirë.

Ministri në detyrë i Kulturës, Kujtim Gashi, ka thënë të martën se

“vendimin e vitit 2006 askush nuk e ka anuluar. Tash lind pyetja se a janë apo jo valide vendimet e Kuvendit Komunal të Prishtinës”, ka thënë Gashi.

Sipas shkresës së muajit të kaluar, sekretari i Ministrisë së Kulturës, Veton Firzi, kishte njoftuar kryetarin Ahmeti se MKRS-ja ka nënshkruar kontratë lidhur me hartimin e detyrës projektuese me qëllim të publikimit të konkursit ndërkombëtar ideor dhe zbatues për projektin kapital, teatrin e operës dhe baletit. Firzi kishte sqaruar se në tetor kishte parë se në hapësirën dedikuar teatrit të operës dhe baletit është duke u punuar dhe janë vënë rrethoja.

“Kështu që edhe një herë ju riinformojmë ashtu siç ju kemi njoftuar edhe më datë 20.6.2018, që MKRS-ja është në procedurën e përgatitjes së konkursit ndërkombëtar të projektit për objektin në fjalë”, shkruhet në shkresën e protokolluar në ditën e 3-të të nëntorit.

Situata e re midis Komunës dhe MKRS-së del të jetë e pakuptimtë për udhëheqësit e Filarmonisë së Kosovës e Baletit Kombëtar të Kosovës, institucione këto që do të shfrytëzonin teatrin e operës dhe baletit .

(Gjerësisht, sot në “Kohën Ditore”)

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.

Komentet

Shto koment

Të ngjashme