Me shumë zhurmë e entuziazëm, të rinjtë kaçanikas pushtuan skenën teatrore.
“Zhurmë” u shfaq për herë të fundit në Shtëpinë e Kulturës në Kaçanik, duke e shënuar shfaqjen e 15-të, të Klubit Teatral të programit “BRICK”.
Shfaqja trajton një temë mjaft aktuale për të rinjtë e vendit tonë. Marrëdhëniet mësimdhënës-nxënës dhe problemet që mund të shkaktojë mungesa e komunikimit ndërmjet tyre, është tema që regjisori Lulzim Bucolli ka zgjedhur ta shtjellojë në skenë, raporton “Express” i KTV-së.
Nxënësit pjesëmarrës thonë se aktivitetet e zhvilluara në kuadër të programit “BRICK” janë aktivitetet e vetme, në të cilat kanë pasur mundësi të marrin pjesë dhe që ua kanë mundësuar t’i zbulojnë talentet e tyre.
E veçanta e shfaqjes “Zhurmë”, është inkuadrimi i të ashtuquajturve “Spek-aktorë” në të.
Interaktiviteti me publikun u mundëson të rinjve pjesëmarrës që përveç eksperiencës në aktrim, ta zhvillojnë edhe aftësinë për debatim.
Programi “BRICK”, i themeluar dhe zbatuar nga CDF-ja, në partneritet me organizatën joqeveritare “Integra” ka për qëllim fuqizimin e rinisë kosovare. Përveç Klubit të Teatrit, në kuadër të këtij programi janë zhvilluar aktivitete të shumta, në fusha të ndryshme kulturore dhe edukative.
-
17 maj 2019 23:25
-
Shpërndaje në: