Kulturë

Filarmonia e Kosovës përsëri sjellë koncertin me muzikë barokiene

Filarmonia e Kosovës të hënën do të mbajë një koncert me muzikë barokiene, në hapësirat e kishës “Shën Ndou”, në Prishtinë.

Drejtori i Filarmonisë, Baki Jashari, programin e nesërm e ka quajtur të begatë dhe ka thënë se ky koncert do të ketë soliste kryesore dy muzikante nga Franca.

“Bëhet fjalë për koncertin e Korit të Filarmonisë së Kosovës, por kësaj radhe edhe me pjesëmarrje të orkestrës harkore apo një ansambli pak më të madh të Filarmonisë së Kosovës, të cilët do të interpretojnë një program të begatë me vepra nga më të ndryshmet, posaçërisht nga epoka e barokut”, ka thënë Jashari.

Ndërsa, dirigjenti Rafet Rudi këtë koncert e ka cilësuar si një moment i rëndësishëm për punën e Filarmonisë. Në lidhje me programin, Rudi ka thënë se pjesët që do të luhen, janë kryevepra të muzikës barokiene.

“Me këtë koncert ne kemi marrë një detyrë përsipër që për herë të dytë ta bëjmë tërë koncertin me një muzikë specifike barokiene, që do të thotë, e zgjeron interesimin dhe veprimtarinë, vet Filarmonia edhe orkestra dhe kori. Kurse, sa i përket programit që është përgatitur për këtë koncert, dua të them se kam pasur mjaft kujdes që të ketë një tërësi, të funksionojë si tërësi. Në pjesën e parë paraqitet shkurt një program acapella, ku do të shquhen solistët tanë më të mirë të korit që ka mjaft dhe do të ketë edhe ansamble vokale e kështu me radhë, kurse veprat në vazhdim si Vivaldi dhe Pergolesi, janë poenta e programit”, ka njoftuar Rudi, raporton Ksp.

Sopranoja Clemence Garcia e cila do të performojë nesër në këtë koncert, ka thënë se për të është një eksperiencë interesante që do të luajë muzikë baroke në Filarmoninë e Kosovës.

Po ashtu, solistja Caroline Champy, e cila do të performojë si Alto, u shpreh e lumtur për këtë koncert, teksa tregoi se është vizita e parë e saj në Kosovë. Ajo tha se do të jetë përvojë interesante për të pasi që ndodhet në një vend krejt të ri për të.

Përndryshe, koncerti do të mbahet në kishën katolike “Shën Ndou”, në lagjen Ulpianë të Prishtinës, me fillim nga ora 20:00.