Kronikë

1 muaj paraburgim autorit të vrasjes te Parku i kryeqytetit

Gjykata Themelore në Prishtinë ka aprovuar kërkesën e Prokurorisë Themelore në Prishtinë për caktimin e masës së paraburgimit kundër të pandehurit L.I, për shkak të dyshimit të bazuar se ka kryer veprën penale Vrasje e rëndë nga neni 179 par. 1 pika 1.11 të Kodit Penal të Republikës së Kosovës dhe veprën penale Mbajtja në pronësi, kontroll, ose posedim të paautorizuar të armëve nga neni 374 par. 1 të Kodit Penal të Republikës së Kosovës.

“Të pandehurit L.I i është caktuar masa e paraburgimit në kohëzgjatje prej 1 (një) muaji, duke filluar prej dt. 19.11.2017 deri me dt.19.12.2017”, thuhet në njoftimin e gjykatës, transmeton Koha.net.

Gjykata ka konstatuar se kërkesa për caktimin e masës së paraburgimit ndaj të pandehurit L.I është masë adekuate dhe e domosdoshme në këtë fazë të procedurës penale, për sigurimin e pranisë së të pandehurit në procedurë penale dhe zhvillimin e pa penguar të procedurës.

I pandehuri L.I është shtetas i Republikës së Shqipërisë dhe dyshohet se me datë 29.08.2016 ka privuar nga jeta të rinjtë E.A dhe A.G në Prishtinë dhe me këto veprime dyshohet se ka kryer veprën penale Vrasje e rëndë nga neni 179 par. 1 pika 1.11 të Kodit Penal të Republikës së Kosovës. I njëjti ka qenë në arrati nga dt.29.08.2017 deri me dt.19.11.2017, kur edhe është paraqitur vetë në polici.

Pala ka të drejtë ankese kundër këtij vendimi në Gjykatën së Apelit të Kosovës.

Kujtojmë se para pak ditësh ai është dorëzuar në stacionin policor në Prishtinë.