Prokuroria Themelore në Gjilan ka ngritur aktakuzë ndaj të pandehurit XH.E., për shkak të veprës penale ‘’Keqtrajtimi gjatë ushtrimit të detyrës zyrtare ose autorizimeve publike’’.

“Sipas aktakuzës, më 6 shkurt 2020, në shkollën fillore ‘’Dëshmorët e Kombit’’, në fshatin Livoq i Ulët, komuna Gjilan, i pandehuri XH.E., si mësimdhënës, ka keqpërdorur detyrën dhe autorizimet zyrtare, në atë mënyrë që derisa ishte duke mbajtur orën e mësimit, fillimisht e pyet të miturin F.B., se pse nuk i kishte prerë flokët, pastaj kërkon nga ai që të merr një karrige dhe në prani të nxënësve të tjerë ia prenë flokët, ku pas reagimit nga i mituri, i njëjti kishte filluar që ta fyente”, thuhet në njoftim.

LEXO EDHE: Nisin hetimet ndaj mësimdhënësit në Livoq të Poshtëm i cili dyshohet se ia preu flokët një nxënësi

Gjithë ngjarja ishte incizuar nga një nxënës i klasës, i cili pastaj e kishte shpërndarë videon nëpër rrjetet sociale, ndërsa, prokuroria pas publikimit të kësaj video, sipas detyrës zyrtare ka filluar hetimet lidhur me këtë çështje penale.

Koha pati raportuar se drejtori i arsimit, Nazim Gagica, ka deklaruar se në bazë të informacioneve fillestare arsyetimi i mësimdhënësit ka qenë se ka pasur lejen nga prindi që të ndëshkojë nxënësin në këtë formë meqë kishte pasur sjellje të pahijshme.