Një e mitur në Gjakovë, Y. D., e cila u raportua e zhdukur nga data 15 qershor i këtij viti, është gjetur nga policia duke bashkëjetuar me një person.

Drejtoria Rajonale e Policisë në Gjakovë, respektivisht Sektori Rajonal për Hetime me urdhëresë të Gjykatës Themelore në Gjakovë sot me datë 18.12.2019 në ora 06:30 ka realizuar një operacion kontrolli në shtëpinë e personit të dyshuar B.R., i dyshuar për veprën penale “bashkësi jashtëmartesore me personin nën moshën 16 vjeçare”.

LEXO EDHE: Policia kërkon ndihmën e qytetarëve për gjetjen e dy të miturve në Gjakovë

Policia thotë se gjatë operacionit policor është arrestuar personi i dyshuar e po ashtu është gjetur edhe personi i mitur Y. D. e cila ishte raportuar si person i zhdukur nga familjarët e saj që nga data 15.06.2019.

“Me datë 16.12.2019, Drejtoria Rajonale e Policisë në Gjakovë ka lëshuar kërkesën për bashkëpunim me qytetar përmes Mediave për gjetjen e personit viktimë dhe personit të dyshuar për çka Policia e Kosovës falënderon qytetarët për bashkëpunim. Me këtë rast Sektori Rajonal për Hetime po bashkërendon veprimet në bashkëpunim me Prokurorin e Shtetit, Qendrën për Punë Sociale, Mbrojtësin e viktimave me qëllim të zbardhjes së rastit dhe marrjes se masave tjera të nevojshme ligjore”, thuhet në njoftim.