Kronikë

Arrestohen dy të dyshuar për falsifikim të parasë dhe konfiskohen bankënota të dyshuara si të falsifikuara

Policia e Kosovës, konkretisht Drejtoria për Hetimin e Krimeve Ekonomike dhe Korrupsionit, Njësiti i Krimeve Ekonomike kundër korrupsionit, rajoni i Ferizajt, kanë bërë arrestimin e dy personave nën dyshimin për kryerjen e veprës penale ‘falsifikim i parasë’.

Me datën 6 dhjetor 2019, Policia thotë se nga pikëkalimi kufitar në Glloboçicë, njësitet policore kanë marrë informatë për një rast dyshimi për ‘falsifikimin e parasë’, ku të dyshuarit tashmë të arrestuar janë ndaluar nga Policia Kufitare, të cilët gjatë kontrollit në veturën e të dyshuarve kanë gjetur të fshehura kartëmonedha të falsifikuara.

Personat e arrestuar lidhur me këtë rast janë B. A., lindur me 1993 dhe V. H., lindur me 1987, të dy këta shqiptarë shtetas të Maqedonisë.

Image

“Kontrollimi i të dyshuarve është bërë me kërkesë të hetuesve policorë të Kaçanikut, të cilët kishin informatë se të dyshuarit kanë bërë pagesë në një pompë të derivateve me bankënota të falsifikuara, duke u larguar nga vendi i ngjarjes. Gjatë kontrollit të hollësishëm nga Policia Kufitare PKK-Glloboçicë janë gjetur (2x500.00€, 11x100.00€, 60x50.00€) në total 73 kartëmonedha në vlerë prej 5.100.00 €. Të gjitha këto kartëmonedha të dyshuara si të falsifikuara me autorizim të prokurorit të shtetit si provë materiale janë sekuestruar përkohësisht dhe do të dërgohen për ekzaminim në Agjencionin Kosovar për Forenzikë”, ka thënë Policia.

Të dyshuarit janë intervistuar në prani të avokatëve mbrojtës të angazhuar sipas detyrës zyrtare, ndërsa me aktvendim të prokurorit të shtetit të dyshuarve u është caktuar masa e ndalimit prej 48 orëve.