Kronikë

I akuzuari për vrasjen e Donjeta Pajazitajt do të gjykohet për herë të tretë

Katër vjet prej kur është vrarë Donjeta Pajazitaj, procesi gjyqësor për vrasjen e saj do të nisë për herë të tretë. Gjykata Themelore në Pejë do të gjykojë Naser Pajazitin, kushëri i viktimës e që është i dyshuari i vetëm për këtë vrasje.

Aktgjykimi me dënim të përjetshëm për Pajazitin është bërë i plotfuqishëm nga Gjykata e Apelit muaj më parë, por Gjykata Supreme ka gjetur shkelje të dispozitave ligjore të dy shkallëve dhe këtë rast e ka kthyer në rigjykim, shkruan sot Koha Ditore.

Dy aktgjykimet e mëhershme në këtë rast ishin plotësisht të kundërta me njëra-tjetrën. Fillimisht Gjykata Themelore në Pejë kishte nxjerrë aktgjykim lirues për Pajazitajn me arsyetimin se nuk ka prova të mjaftueshme që dëshmojnë se ai është vrasësi.

Ankesa e familjes kundër këtij aktgjykimi në Gjykatën e Apelit është aprovuar dhe rasti është kthyer në rigjykim në Gjykatën e Pejës. Në gjykimin e dytë ky institucion e ka dënuar Pajazitajn me burgim të përjetshëm dhe aktgjykimi është aprovuar nga Gjykata e Apelit. Të dy këto aktgjykime janë prishur tashmë nga Gjykata Supreme.