Kronikë

Shpëtojnë me lëndime të lehta pesë persona që ranë në Lumbardh me veturë

Kanë shpëtuar me lëndime të lehta pesë persona, të cilët gjendeshin në veturën që doli nga rruga kryesore e Rugovës dhe ra në Lumbardh.

Aksidenti ka ndodhur në mesnatën e kaluar afër urës në afërsi të fshatit Shtupeq i Vogël.

Këtë aksident e ka konfirmuar për Kohën Ditore zyrtari për informim i Policisë për Rajonin e Pejës, Driton Rugova.

“Në rrugën Pejë-Rugovë, në fshatin Shtupeq i Vogël, të premten rreth orës 00:30, ka ndodhur një vetaksident trafiku. Si pasojë e aksidentit, lëndime të lehta trupore kanë pësuar pesë persona që ndodheshin në veturë. Shkak i aksidentit ka qenë mospërshtatja e shpejtësisë dhe moskujdesi i drejtuesit, i cili me të arritur në fshatin Shtupeq në drejtim të Pejës, humbur kontrollin e veturës dhe ka rënë në Lumbardh”, ka thënë Rugova.

Personat e lënduar janë dërguar në Spitalin e Përgjithshëm të Pejës ku janë trajtuar dhe kanë kaluar natën.

Pas tretmanit mjekësor, siç tregon zëdhënësi i këtij spitali për Kohën Ditore, Naim Sahiti, të premten ata janë liruar nga spitali.

“Këta pacientë nuk janë duke u trajtuar më në spital. Janë liruar të gjithë sot. Ata kanë pas lëndime, por asnjëri nuk ka pas lëndime serioze”, tha Sahiti.