U sekuestrohen rreth 40 mijë euro false, arrestohen dy persona Foto ilustrim

U sekuestrohen rreth 40 mijë euro false, arrestohen dy persona

13 May 2019 16:14

Dy persona janë arrestuar, nën dyshimin se kanë kryer veprën penale të falsifikimit të parave.

Gjatë bastisjes, Policia ka arritur të konfiskojë te të dyshuarit 393 kartëmonedha me vlerë nga 100 euro, që bëjnë fiks 39 mijë e 300 euro. Rasti ka ndodhur në Pejë.

“Policia e Kosovës, konkretisht sektori i Hetimeve të Krimeve Ekonomike pas aplikimit të metodave dhe teknikave të avancuara të hetimit, mbështetur nga njësitë e specializuara të Policisë së Kosovës, ka zhvilluar operacionin policor lidhur me planin operativ ‘100 euro’. Gjatë këtij operacioni policor janë arrestuar dy persona të dyshuar, nën dyshimin se kanë kryer veprën penale ‘falsifikim i parasë, vënie në qarkullim si të vërteta’”, thuhet në njoftimin për media të Zyrës për Informim të Policisë së Kosovës.

Personat e dyshuar të arrestuar gjatë këtij operacioni janë: I. S. lindur me 1981, mashkull shqiptar dhe F. B. lindur me 1993, po ashtu mashkull shqiptar.

“Gjatë operacionit policor janë sekuestruar treqind e nëntëdhjetë e tri (393) kartëmonedha të dyshuara si të falsifikuara prej njëqind euro (100€), vlera e të cilave arrin tridhjetë e nëntëmijë e treqind euro (39,300.00 €uro ). Me urdhër verbal të gjyqtarit, nga Gjykata Themelore në Pejë, janë kontrolluar shtëpitë e të dyshuarve, me ç’rast janë sekuestruar dy (2) telefona celularë, një automjet i tipit Golf V ngjyrë e zezë me targa vendore”, thuhet më tej në njoftim.

Policia tregon po ashtu se në lidhje me rastin është njoftuar prokurori kujdestar i Prokurorisë Themelore në Pejë, Departamenti i Krimeve të Rënda dhe me aktvendim personi nr. 1 dërgohet në mbajtje për 48 orë, ndërsa personi nr.2 lirohet në procedurë të rregullt.

© KOHA. Të gjitha të drejtat janë të rezervuara.

Komentet

Shto koment

Të ngjashme