Kronikë

Gjuetarët në Ferizaj thonë se kafsha e vrarë nuk ishte rrëqebull

Isuf Idrizi, kryetar i Shoqatës së Gjuetarëve “Shqiponja” në Ferizaj, ka thënë për portalin Koha.net se kafsha e vrarë nga një anëtar i tyre nuk është rrëqebull.

Vret rrëqebullin në Ferizaj, poston fotografitë në Facebook

Në raportin e Policisë së Kosovës të premten është raportuar se në fshatin Varosh të Ferizajt është vrarë një rrëqebull. Sipas këtij raporti, gjuetari pas vrasjes së kafshës kishte postuar fotografitë në Facebook.

Idrizi ka thënë se kafsha e vrarë nga gjuetari i anëtarësuar në këtë shoqatë, ishte një mace e egër.

“Rasti nuk ka ndodhur në Varosh. Rasti ka ndodhur në malet e Pleshinës. Edhe gjuetari është i Pleshinës. Ai ka ardhur në shoqatë dhe ka pranuar ta ketë vrarë kafshën, por ajo ishte macë e egër, jo rrëqebull”, ka thënë Idrizi për portalin Koha.net.

“Rrëqebulli në majat e dy veshëve ka tufa qimesh dhe është më i madh sesa macja e egër”, ka sqaruar ai.