Kronikë

Tronditet mafia në Itali, pendohet bosi mafioz në aferë me shqiptarët

Drejtësia italiane i ka dhënë një tjetër goditje të fortë mafias pugliese Sacra Corona Unità.

Bosi mafioz Tommaso Montedoro i klanit Casarano është bërë i penduar e bashkëpunëtor i drejtësisë dhe është marrë tashmë në mbrojtje nga shteti italian.

Klani Casarano që vepronte në pjesën e ulët të territorit të Salentos, kishte në bazë të aktivitetit të tij kriminal, trafikun e lëndëve narkotike, kryesisht heroinë e kokainë të cilën e kryente falë bashkëpunimit me trafikantë shqiptarë.

Sipas investigimeve ky klan mafioz i Sacra Corona Unita ishte i aftë të trafikonte disa kg drogë heroinë e kokainë në javë duke nxjerrë fitime të mëdha.

Lajmi i pendimit të bosit Tommasso Montedoro publikuar më parë nga mediat italiane, siç transmeton oranews, është konfirmuar sot dhe nga zyra e avokatisë së ish-bosit mafioz.

Si i penduar i drejtësisë, Tommaso Montedoro, është trasferuar gjatë këtyre orëve në një vend sekret e ka 6 muaj kohë të zbardh të gjitha sekretet e klanit të tij mafioz Casarano por dhe të mafias pugliese Sacra Corona Unita, duke i vënë të gjitha informacionet e tij në dispozicion të Prokurorisë italiane.

Bosi mafioz Montedoro u arrestua përgjatë operacionit të koduar "Diarchia" në qershor të 2017.

Mes 14 personave të arrestuar të këtij operacioni ishte dhe shqiptari durrsak Sabin Braho, banues në Brindizi e me një rol kyç në trafikun e drogës për llogari të këtij klani mafioz.

Po pak kohë para ekzekutimit të operacionit "Diarchia", autoritetet italiane kanë arrestuar një tjetë shqiptar që punonte për llogari të klanit Casarano. Eljos Fasku u kap në flagrancë ndërsa trafikonte 2.6 kg heroinë.

Ndaj bosit të penduar rëndon dhe akuza e urdhëruesit të vrasjes më 2016 të ortakut të tij në aferat kriminale Augustino Potenza e për vrasje e tentativa vrasje të kryera gjatë viteve të fundit në territorin e kontrolluar nga klani Casarano.

Gjthashtu ndaj 14 anëtarëve të arrestuar të klanit mafioz që në fund të shtatorit priten të dalin para drejtësisë rëndojnë dhe akuzat e trafikut të armëve, grabitje me armë në disa institucione bankare, zhvatje me dhunë të sipërmarrjeve të ndryshme e riciklim parash.