Kronikë

Gjykata në Prishtinë dënon me rreth 5 vjet burgim një person për pjesëmarrje në grup terrorist

Gjykata Themelore në Prishtinë ka dënuar me 56 muaj burgim H.S., që akuzohej për pjesëmarrje në grup terrorist.

H.S. gjendej në paraburgim që nga 1 gushti i vitit 2018. Sipas, Gjykatës, të dënuarit i llogaritet edhe koha e kaluar në paraburgim.

“Të akuzuarit H.S i është vazhduar paraburgimi deri në plotfuqishmërinë e aktgjykimit, por jo më shumë se dënimi i shqiptuar me burgim”, thuhet në njoftim.

H.S. akuzohet se më 23 nëntor të vitit 2015, kishte udhëtuar me bashkëshorten dhe vajzën e mitur nga Kosova për në Turqi dhe përmes lidhjeve kishte depërtuar në Siri, duke iu bashkëngjitur ISIS-it.

“I akuzuari me datë 23.11.2015, me paramendim dhe me dashje si dhe me përgatitje paraprake së bashku me bashkëshorten e tij dhe vajzën e mitur kishte lëshuar territorin e Republikës së Kosovës, përmes Aeroportit Ndërkombëtar “Adem Jashari” në Prishtinë dhe kishte udhëtuar për në qytetin e Stambollit të Republikës së Turqisë dhe përmes lidhjeve të caktuara kishte depërtuar në Siri, me qëllim që t’i bashkëngjitet organizatës terroriste “ISIS”, e cila në këto vende ka qenë duke u luftuar, është angazhuar si pjesëtarë i “ISIS-it”, si administrator në Byronë e ushtarëve të plagosur nën administrimin e “ISIS-it”, është financuar nga “ISIS” me shumën e të hollave prej nga 100 Dollar Amerikan në muaj, duke bashkëpunuar edhe me epror dhe luftëtarë të “ISIS-it”, si Lavdrim Muhaxheri etj, e që më pastaj është dorëzuar tek Forcat Demokratike Siriane, ku edhe me datë 28.05.2022 është riatdhesuar në Republikën e Kosovës”, thuhet në aktakuzën.