I akuzuari Vesel Abdullahu, ka mohuar se në dhjetor të 2020-tës, ka kontrabanduar një cjap nga Serbia për në Kosovë, duke iu shmangur kontrollit doganor.

Këtë deklarim, ai e ka dhënë të enjten, në Gjykatën Themelore në Gjilan, dega në Kamenicë, gjatë fjalës së tij hyrëse, raporton “Betimi për Drejtësi”.

“Unë jam i pafajshëm. Unë në Kosovë e kam ble cjapin, me policinë s’mund të shtyhem tash”, ka thënë i akuzuari.

Kurse, prokurorja Huma Jetishi ka deklaruar se ka prova të mjaftueshme që vërtetojnë se i akuzuari ka kryer veprën penale me të cilën ngarkohet.

“Propozoj gjykatës që të shqyrtohen dhe administrohen të gjitha provat, në mënyrë që të vërtetohet fajësia e të pandehurit”,  ka thënë prokurorja Jetishi.

Gjykatësi Sadri Krasniqi, seancën tjetër për këtë rast e ka caktuar të mbahet më 16 mars të këij viti.

Prokuroria Themelore në Gjilan, më 30 dhjetor 2020, ka ngritur aktakuzë ndaj Vesel Abdullahut, me arsyetimin se ai në dhjetor të 2020-tës, në fshatin Rogaçicë të Kamenicës, është zënë nga Policia Kufitare, duke drejtuar automjetin “Golf II”, në të cilin ka transportuar një cjap në vlerë prej 80 euro, të cilin ai e ka siguruar në Republikën e Serbisë, duke iu shmangur kontrollit doganor dhe për këtë nuk ka pasur dokumantacion mbi origjinën e mallit.

Me këtë, Vesel Abdullahu po akuzohet se ka kryer veprën penale “Kontrabandimi i mallrave”, nga neni 311 paragrafi 2 më lidhur me paragrafin 1 të Kodit Penal, vepër kjo e dënueshme me gjobë ose me burgim deri në tre vjet. /BetimipërDrejtësi