Kronikë

Gjykata ia cakton masën e paraburgimit të miturit i cili dëmtoi kamionët nga Rumania

Gjykata Themelore në Gjilan ia ka caktuar masën e paraburgimit prej 30 ditësh një të mituri i cili ka dëmtuar gjashtë kamionë transportues dhe një autovinç.

Rasti ka ndodhur në rrugën qarkore në qytetin e Gjilanit, ndërkaq transportuesit e dëmtuar janë nga Rumania.

Ata po transportin materiale të destinuara për Majën e Kikës në komunën e Kamenicës ku edhe gjendet parku i energjisë me erë.

Zëdhënësi i Gjykatës Themelore, Sabit Shkodra, tha se arsyeja që Gjykata ka caktuar masën e paraburgimit ndaj të miturit është se i njëjti edhe në të kaluarën ka kryer vepra tjera penale. Ai ka treguar se vlera e dëmit që është shkaktuar është 50 mijë euro.

“Ju njoftojë që gjyqtari i procedurës paraprake në Departamentin për të Mitur, me datë 11.12.2020, ka caktuar masën e paraburgimit prej një muaj ndaj të miturit E. K. i cili dyshohet se ka kryer veprën penale për shkak të veprës penale asgjësimi apo dëmtimi i pasurisë, vepër e sanksionuar me Kodin Penal të Republikës së Kosovës. Sipas shkresave në lëndë shihet se i mituri në rrugën qarkore në Gjilan, saktësisht në parkingun e kompanisë “Auto Kosova’’ me dashje e ka dëmtuar ose e ka bërë të pa përdorshme pasurinë e të dëmtuarve-kompanisë ku kanë qenë të parkuar gjashtë kamion transportues dhe një auto –vinç, në atë mënyrë që me një shufër metali, i ka thyer xhamat e 6 kamionëve transportues dhe një auto-vinç, në vlerë prej 50 mijë euro të shtetit Rumun, të cilët po transportonin materiale për në majën e Kikës”, ka thënë ai.

Kompania “Auto Kosova” në përgjigjen e saj ka deklaruar se nuk është pjesë e asnjë konflikti dhe nuk është as palë e dëmtuar, meqë në këtë rast vetë kishin lejuar që këta transportues të parkoheshin në hapësirat e saj.

“Po kishte ndodhur një aksident në rrugën qarkore dhe kamionët të cilët po transportonin materiale të energjisë me erë na kanë telefonuar dhe na kanë pyet nëse është e mundshme që t’i parkojnë kamionët e tyre në hapësirat tona, sepse nuk kishin mundësi që të lëviznin. Dhe u kemi thënë që po. Dhe një person në mëngjes ka hy brenda dhe u ka thy xhamat. Ata rumunët kanë qenë duke fjet në kamionët e tyre kur ka ndodh kjo. Nuk kam informata për arsyet për çfarë ka ndodh”, thuhet në përgjigjen e tyre.

Ndërkaq motivet për këtë sulm ndaj transportuesve rumunë dyshohet të jetë konkurrenca ndërmjet kompanive vendore. Dhe se transportuesit rumunë janë gjendur në mes.

Kompania Laquila në Prishtinë ka qenë e angazhuar për shoqërimin e transportuesve rumunë brenda territorit të Kosovës. Shoqërimi bëhet për shkak të makinerisë së rëndë e cila qarkullon me rastin e bartjes së pjesëve të cilat nevojiten për parkun e energjisë me erë. Në përgjigjen e kompanisë Laquila ata besojnë që sulmi ka ardhur nga një kompani tjetër e cila ka qenë e pakënaqur që nuk është angazhuar rreth transportit të pajisjeve të energjisë me erë.

“Ne i përcjellim mjetet e rëndë dhe u nxjerrim lejen e posaçme. Alarmojmë se në rrugë po qarkullojnë mjetet e renda. Dhe këtë e kemi bërë edhe në këtë rast. Versioni është se ai u ka thyer xhamat pse nuk po punojnë me atë kompaninë në të cilin bën pjesë i arrestumi. U është thënë rumunëve pse nuk po punoni me ne por po punoni me ata. Në mëngjes ka ndodh rasti u janë thyer xhamat. Dëmet tash janë të mëdha. Dëmi më i madh është se rumunët me kamionët e tyre kanë kaluar nëpër Serbi me xhama të thyer. Kjo e dëmton imazhin e Kosovës. Sa i përket njerëzve që janë të përfshirë në sulm nuk është çështje e jona të përmendin emrat. Është çështje e drejtësisë”, thuhet në përgjigjen e tyre.

Image