Arbëri

Gjilani kërkon 45 mijë euro nga MBZHR për kompensimin e dëmeve të shkaktuara nga breshëri

Komuna e Gjilanit, përkatësisht Drejtoria e Bujqësisë ka kërkuar mbështetje nga ministria e Bujqësisë, Pylltarisë dhe Zhvillimit Rural në vlerë prej 45 mijë euro, për t’ua kompensuar bujqve dëmet të shkaktuara nga breshëri më 14 dhe 26 qershor.

Drejtori për Bujqësi, Ramiz Ramadani, ka thënë se Komuna e Gjilanit nuk ka mundësi t’ua kompensojë shumën e sipërpërmendur, prandaj i janë drejtuar ministrisë përkatëse.

Ramadani theksoi se menjëherë pas rënies së breshrit, ka themeluar komisionin profesional, i cili pas vizitave në terren ka konstatuar se dëmet janë të konsiderueshme dhe i janë dokumentuar ministrisë së Bujqësisë.

Ai tha se ka shpresë që kjo kërkesë do të merret parasysh, në mënyrë që t’i dilet në ndihmë bujqve të dëmtuar të komunës së Gjilanit, të cilët jetojnë nga kjo veprimtari.