Arbëri

Komuna e Podujevës keqpërdori buxhetin duke blerë pajisje mjekësore me çmime shumë të larta

Me çmime astronomike duket se janë blerë disa pajisje mjekësore për Qendrën Kryesore të Mjekësisë Familjare në Podujevë.

Në një kontratë të vitit 2017, që Komuna e Podujevës e kishte lidhur me kompaninë “Medica”, shihet që çmimet për pajisjet që janë blerë për nevojat e QKMF-së janë shumë më të larta se ato të tregut, raporton KOHA.

Dyshime për keqpërdorim të buxhetit për shëndetësi ka ngritur edhe kryetari i Sindikatës së Punëtorëve Shëndetësorë, Sheqir Maliqi, të cilit i ka rënë në dorë kjo kontratë.

“P.sh. një sterilizator në bazë të kësaj fature është blerë 2250 euro, a në treg maksimumi 500-600 euro, qysh i kam pyetur unë profesionistët që i kanë ordinanca private që janë të nevojshme ato. Kemi p.sh. enë veshkore 50 euro, gërshërë 30 euro, asnjë nuk kushton mbi 5 euro, më të mirat 15 euro, po që ato nuk vijnë te na asnjëherë. Kemi vetëm frigorifer, veç ia kanë shtua frigorifer për reagensa, është diku 70 cm, që në treg është 70-80 euro. Dy frigoriferë janë blerë nga 450 euro”, ka thënë Maliqi.

Krahasuar me çmimet që tash janë në treg, për shembull, Komuna për një

defibrilator ka paguar 5 mijë e 850 euro, ndërsa sipas çmimeve të një depoje farmaceutike ai kushton 1 mijë euro, që i bie se Komuna ka paguar gati pesëfish më shumë.

Pastaj 6 sterilizatorë Komuna i ka blerë nga 2 mijë e 250 euro, kurse sipas çmimit të tregut një i tillë kushton 400 euro.

Po ashtu, Komuna i ka blerë 10 çanta emergjente komplet nga 380 euro dhe po ashtu 15 peshore digjitale për të rritur me matëse gjatësie nga 350 euro, e që të dyja në treg shiten për 30 euro për copë.

Ushtruesi i detyrës së drejtorit të QKMF-së, Bejtush Jashari, i cili ka qenë kryetar i Komisionit për pranimin e këtyre pajisjeve, ka thënë se nuk ka qenë detyrë e tyre t’i shikojnë çmimet e pajisjeve, por vetëm nëse sasia e tyre përputhet me ato në kontratë.

KOHA ka provuar të kontaktojë edhe Zaim Thaçin, i cili në kohën kur është nënshkruar kjo kontratë ka qenë në krye që QKMF-së, por i njëjti nuk e ka hapur telefonin.

Përgjigje nuk kanë kthyer as zyrtarët komunalë të Podujevës.