Arbëri

Komunat lindore kërkojnë zbatim të shpejtë të sigurimeve shëndetësore për qytetarët

Kosova nuk ka arritur të ndërtojë sistem të duhur shëndetësor dhe si pasojë, qytetarët nuk kanë ende sigurime shëndetësore.

Zbatimi i sigurimeve shëndetësore, ishte një prej kërkesave të dala për Qeverinë nga takimi i kryetarëve të komunave të regjionit të lindjes, që u mbajt sot në Gjilan, e ku u diskutua edhe menaxhimi i gjendjes emergjente si pasojë COVID-19.

Në takim ishin të pranishëm përfaqësuesit e 11 komunave, si Gjilani, Vitia, Kamenica, Ferizaj, Kllokoti, Ranillugu, Parteshi, Novobërda, Kaçaniku, Shtërpca dhe Hani i Elezit.

Kryetari i Kamenicës, Qëndron Kastrati në emër të komunave pjesëmarrëse ka kërkuar nga Qeveria e Kosovës t’i përshpejtojë hapat dhe të zbatojë sigurimet shëndetësore për qytetarët.

“Sigurimet shëndetësore janë një prej nevojave dhe prioriteteve. Duhet pasur parasysh se çështja e sigurimeve shëndetësore është çështje e Qeverisë së Kosovës, më saktësisht e Ministrisë së Shëndetësisë dhe po kërkojmë bashkërisht tashmë nga ministri i ri i Shëndetësisë me u mundu me e shty përpara këtë proces” ka thënë ai.

Kurse kryetari i Gjilanit, Lutfi Haziri ka deklaruar se në këtë periudhë të pandemisë, komuna është angazhuar sikurse edhe të tjerat për parandalimin e përhapjes së virusit i cili ka marrë edhe jetë të njerëzve.

“Jemi regjioni me koordinimin më të mirë në luftën kundër pandemisë globale Covid-19. Që nga Kamenica në njërën anë e deri në Komunën e Shtërpcës në anën tjetër, duke përfshirë edhe komunat tjera, kemi arritur të bashkëpunojmë dhe të involvojmë të gjitha institucioneve lokale e regjionale në parandalim të virusit”, ka thënë ai.

Ndërkaq kryetari i Komunës së Vitisë, Sokol Haliti ka deklaruar se komunat në këtë kohë të pandemisë po përballen me deficitin financiar që është pasojë e rënies të të hyrave. Ai ka deklaruar se kërkesat e tyre për të mbuluar deficitin financiar do të merren parasysh nga Qeveria e Kosovës.

Kryetari i Komunës së Novobërdës, Svetislav Ivanoviq, ka deklaruar se është bërë një punë e mirë në tejkalimin e kësaj faze të vështirë të përballjes me virusin. Ka ofruar bashkëpunimin e tij të plotë në raport me komunat e tjera.

E kryetari i Hanit të Elezit, Rufki Suma, ka deklaruar se si komunë e cila ka afër edhe pikën kufitare, ka pasur vështirësi në menaxhimin e situatës emergjente, ngase ka pasur një staf të kufizuar shëndetësor. Ai ka falënderuar komunat e tjera të cilat kanë asistuar me personel shëndetësor.