Disa pronarë tokash në Shtime protestojnë kundër ankandit të AKP-së në këtë komunë

Luljeta Beselica Luljeta Beselica 16 October 2019 19:59

Për shumë vjet, më shumë se 10 familje ishin pronarë trashëgimtarë të disa pronave në Komunën e Shtimes.

Por, tash, Agjencia Kosovare e Privatizimit ka vendosur që ato t’i hedhë në ankand publik për shitje, raporton KTV.

Sipas banorëve, më 1982, zyrtarisht, është iniciuar një marrëveshje për t’ia shitur këtë pronë fabrikës së tubave, mirëpo marrëveshja ishte ndërprerë për shkak të moskompensimit të saj, e ndërkohë, dokumentet e pronës nuk po mund t’i gjejnë banorët.

Me protesta, këta banorë kanë kërkuar nga ky institucion anulimin e ankandit derisa të zgjidhen kontestet pronësore.

AKP-ja, fillimisht, ka hedhur në ankand rreth 3 ari, mirëpo fati i njëjtë i pret edhe 40 familje të tjera të cilat kanë pronat e tyre në këtë zonë.

Në një përgjigje me shkrim, zyrtarë të AKP-së kanë thënë se në ankand publik nxjerrin vetëm pronat shoqërore.

“Çdo palë pretenduese ka të drejtë t’i drejtohet në çdo kohë Dhomës së Posaçme të Gjykatës Supreme të Kosovës, e cila ushtron juridiksion ekskluziv për të gjitha kontestet eventuale pronësore, të cilat kanë të bëjnë me ndërmarrjet shoqërore ose Agjencinë Kosovare të Privatizimit”, thuhet në përgjigjen e AKP-së.

© KOHA. Të gjitha të drejtat janë të rezervuara.

Komentet

Shto koment

Të ngjashme