Arbëri

Për rrahjen e nxënësit në Rahovec shkolla nuk shqetësohet, e Drejtoria e Arsimit nuk di gjë

Dhuna fizike ndaj nxënësve nëpër shkolla të vendit, sidomos në fshatra, ende është e pranishme.

Në shkollën "Dëshmorët e Lirisë", në Pataqan të Ulët në Rahovec, arsimtari i gjuhës shqipe, Samidin Zeka, e ka rrahur një nxënës të klasës së 9-të.

Ky i fundit kishte hyrë në fushë të sportit për të luajtur me të tjerët, por profesori i kishte thënë atij të dalë nga fusha. Derisa nxënësi nuk e kishte dëgjuar, ai e ka rrahur atë, raporton KTV.

Zeka dhe drejtori i kësaj shkolle, Avdi Mustafa, nuk e kanë parë të arsyeshme të flasin rreth kësaj çështjeje, duke e konsideruar si joserioze.

Përderisa prej frikës se fëmijës së tyre mund t’i përsëritet kjo, as prindërit nuk kanë pranuar të flasin.

E drejtori i Arsimit në komunën e Rahovecit ka thënë se nuk është në dijeni në lidhje me rastin, por ka shtuar se do të marrë informacione, për të parë se çfarë masash do të merren ndaj mësimdhënësit në fjalë.

Nxënës të tjerë në shkollës, prapa kamerës, kanë thënë se kjo nuk është hera e parë që arsimtari në fjalë përdor dhunë fizike, pasi që ka edhe të tjerë që janë rrahur.