Arbëri

Fontana e Ferizajt kthehet në pus peshkimi nga piktori Maloku

Artisti Sokol Maloku nuk mbante në dorë si zakonisht brushën për piktura të martën pasdite. Ai para objektit të Komunës së Ferizajt mori në dorë grepin e peshkimit dhe zuri një peshk në pusin e krijuar në fontanën e këtij sheshi.

Kjo performancë e tij erdhi si shenjë pakënaqësie ndaj Komunës së Ferizajt që i ka mbetur i papërfunduar sheshi para objektit të saj, transmeton Koha.net.

Maloku, në një deklaratë për portalin Koha.net, ka thënë se vrazhdësia e pamjes së sheshit e ka shtyrë që të realizonte këtë performancë të martën.

“Ra një fëmijë sot aty dhe u trishtova. Mezi e nxorëm. Kjo është demagogji e atyre që qeverisin. Çfarë mund të bëjnë më shumë komunarët, kur as pragun e shtëpisë së tyre nuk kanë arritur ta rregullojnë”, ka thënë Maloku.

Punimet për sheshin e Ferizajt kanë mbetur pa u përfunduar që nga koha e qeverisje së LDK-së. Aty ishte paraparë ndërtimi i një fontane, teksa aktualisht aty është bërë një pus.

Pushteti aktual i drejtuar nga PDK-ja nuk ka bërë asnjë lëvizje në drejtim të përfundimit të projektit. Megjithëse ka paralajmëruar ndryshime në përmbajtjen e projektit aktual për sheshin qendror, pushteti aktual është zhytur në borxhe dhe nuk dihet kur mund të përmbyllet projekti.

Image

Image
Image
Pamje e fontanës në fotografinë e prillit të vitit 2018