-
Traduit par : Vita Abrashi-Kajtazi
- 28 août 2026 13:15
- Partager à:
Një studim i madh britanik sugjeron se terapia hormonale zëvendësuese (HRT) mund të lidhet me rrezik më të ulët të demencës te gratë pas menopauzës, ka shkruar Le gardien.
Studiuesit ndoqën për rreth 13 vjet më shumë se 183 mijë gra në Mbretërinë e Bashkuar. Gratë që kishin përdorur HRT për të paktën një vit kishin 10 për qind më pak rrezik për çdo lloj demence, 16 për qind më pak rrezik për Alzheimer, si dhe deri në 26 për qind më pak rrezik te gratë që kishin kaluar menopauzë përmes ndërhyrjes kirurgjikale.
Përfitimi dukej më i madh edhe te gratë që kishin pasur ekspozim më të ulët ndaj estrogjenit gjatë jetës, për shembull për shkak të menopauzës së hershme.
Studiuesit vunë re gjithashtu një lidhje më të fortë te gratë që mbartin variantin gjenetik ApoE4, i cili lidhet me rrezik më të lartë për Alzheimer.
“HRT është përdorur prej kohësh kryesisht për të lehtësuar simptomat e menopauzës, si afshet e nxehta dhe djersitjet gjatë natës. Ky studim sugjeron se ajo mund të ketë gjithashtu një rol në shëndetin afatgjatë të trurit për disa gra”, ka thënë profesoresha Anne-Marie Minihane, e cila drejtoi studimin.
Nuk do të thotë ende se HRT parandalon demencën
Studiuesit theksojnë se rezultatet nuk provojnë se HRT shkakton uljen e rrezikut të demencës. Studimi ishte vëzhgues, jo një provë klinike e kontrolluar, ndaj mund të ketë edhe faktorë të tjerë që ndikojnë në rezultate.
“Ky studim i vetëm nuk mjafton për të na treguar nëse HRT duhet të përdoret për të ulur rrezikun e demencës, por ofron prova të tjera se koha e fillimit të HRT dhe historia hormonale e një gruaje mund të kenë rëndësi”, ka thënë doktoresha Susan Kohlhaas nga Alzheimer’s Research UK.
Ajo ka shtuar se nevojiten kërkime të mëtejshme për të kuptuar nëse vetë HRT është përgjegjëse për ndryshimin e rrezikut dhe cilat forma të saj mund të kenë ndikim.