Sulmuesi i Cagliarit, Yael Trepy, është në kujdes intensiv në spital, pasi humbi ndjenjat në një pishinë në Sardenjë.
Cagliari lëshoi një deklaratë përmes të cilës njoftoi se 20-vjeçari po trajtohet në spitalin në Sassari.
Është raportuar se Trepy u transportua për në spital me helikopter, pas incidentit në një vilë, të dielën pasdite.
“Klubi është në kontakt të vazhdueshëm me qendrën shëndetësore dhe familjen e lojtarit. Klubi po e monitoron nga afër përparimin e gjendjes së tij”, ka thënë Cagliari në deklaratë.
Lojtarët e Cagliarit e kishin të lirë fundjavën, pas fitores në ndeshjen për Kupë, të premten. Trepy luajti 54 minuta.
Edicionin e kaluar ai e shënoi një gol në tetë paraqitje në Serie A.
