SHBA-ja ka konfirmuar vendosjen e një arme hapësinore në orbitën e Tokës. Kjo është hera e parë që vendi pranon ekzistencën e kapaciteteve të tilla sulmuese.
Sekretari amerikan i Forcave Ajrore, Troy Meink, ka deklaruar se arma e vendosur në orbitë ishte e domosdoshme për të mbrojtur forcat amerikane nga veprimet armiqësore.
Duke folur të hënën në Konferencën për Ajrin, Hapësirën dhe Kibernetikën, Meink ka thënë se SHBA-ja ishte e përgatitur përballë "kërcënimeve në zhvillim", por nuk ka dhënë detaje të mëtejshme mbi kapacitetet e armës apo kohën kur ajo u vendos në orbitë.
Drejtues të lartë ushtarakë kanë deklaruar më parë se planifikonin të forconin kapacitetet ushtarake në hapësirë, duke iu referuar programeve ruse dhe kineze që synojnë zhvillimin e mënyrave për të sulmuar dhe neutralizuar satelitët amerikanë në rast konflikti të ardhshëm.
Administrata Trump ka deklaruar se kapacitetet hapësinore si dhe raketat përgjuese, përbëjnë një pjesë thelbësore të sistemit të planifikuar të mbrojtjes "Golden Dome" (Kupola e Artë), që synon të mbrojë SHBA-në nga raketat dhe kërcënimet e tjera ajrore.
Një traktat i vitit 1967 ndalonte vendosjen e armëve të shkatërrimit në masë në orbitë. Që atëherë, fuqitë kryesore, përfshirë SHBA-në, Rusinë dhe Kinën, kanë eksploruar kapacitete të tjera jashtë kornizës së traktatit, siç është shënjestrimi i satelitëve të rivalëve, të cilët janë jetikë për komunikimet ushtarake, mbikëqyrjen dhe navigimin.
Vitin e kaluar, presidenti Donald Trump, ka nxjerrë një urdhër ekzekutiv që theksonte rolin e Forcës Hapësinore të SHBA-së jo vetëm në mbrojtjen e aseteve, por edhe si forcë sulmuese.
Forca Hapësinore e SHBA-së, dega më e re e ushtrisë amerikane në më shumë se 70 vjet, është krijuar në vitin 2019 si një masë për të mbrojtur asetet amerikane në hapësirë, përfshirë qindra satelitë që përdoren për komunikim dhe mbikëqyrje.
Në fillim të shkurtit, është zbuluar se dy satelitë rusë me shumë gjasa kanë përgjuar komunikimet e të dhjetëra satelitëve evropianë që nga pushtimi i Ukrainës nga Rusia në vitin 2022.
Përgjime të tilla mund t'u kenë mundësuar shërbimeve të inteligjencës ruse të lexojnë të dhënat e ndjeshme që ata transmetojnë, ose hipotetikisht, madje të marrin kontrollin e satelitëve.