Një dron rus ka goditur një tren pranë kufirit Ukrainë-Poloni, pak pasi ish-kryeministri britanik Boris Johnson dhe zyrtarë të lartë evropianë të sigurisë kishin kaluar nëpër atë zonë.
Nuk pati viktima pas sulmit rus në Yahodyn, i cili goditi lokomotivën e trenit. Të gjithë pasagjerët ishin evakuuar, thanë autoritetet ukrainase. Rusia tha se kishte goditur “infrastrukturën hekurudhore” në Ukrainën perëndimore, ka raportuar BBC-ja.
Johnson dhe disa nga këshilltarët më të lartë evropianë të sigurisë, përfshirë britanikun Jonathan Powell, kishin udhëtuar përgjatë së njëjtës linjë hekurudhore gjatë kthimit nga një konferencë në kryeqytetin ukrainas, Kyiv.
Ish-kryeministri britanik tha: “Nuk e di se çfarë logjike të shtrembëruar e shtyu Putinin të hidhte në erë një lokomotivë ukrainase të palëvizshme në kufirin me Poloninë këtë mëngjes” dhe pyeti: “Kur do t’u japim atyre mbrojtjen ajrore që u nevojitet?”
Kompania shtetërore hekurudhore e Ukrainës, Ukrzaliznytsia, tha se ishte zbuluar një dron me motor reaktiv dhe se ishte dhënë urdhër për evakuim 15 minuta para sulmit.
Ajo konfirmoi se treni me të cilin udhëtonin Johnson dhe të tjerët kishte qenë më herët në stacionin Yahodyn dhe tha se ishte marrë vendim që treni të nisej më herët se sa ishte planifikuar.
“Është krejt e mundur që objektivi i këtij droni të ketë qenë treni diplomatik, i cili ishte larguar nga stacioni më herët se sa pritej për shkak të ndryshimit të orarit... si pasojë e kërcënimeve të vazhdueshme për sulme ruse”, tha Ukrzaliznytsia.
Autoriteti hekurudhor tha gjithashtu se ish-drejtori i CIA-s, David Petraeus, kishte qenë në një tren tjetër në stacionin Yahodyn në momentin e sulmit me dron.
Autoritetet polake thanë se një dron rus kishte goditur 2 kilometra larg kufirit me Poloninë.
Ish-kryeministri suedez Carl Bildt, i cili gjithashtu kishte marrë pjesë në konferencën në Kyiv, i tha BBC-së se pasagjerëve në trenin e tij u ishte kërkuar të përgatiteshin për evakuim, përpara se më pas t’u lejohej të vazhdonin udhëtimin.
“Në trenin ku ndodhesha, morëm urdhër të përgatiteshim për evakuim pasi treni ishte ndalur. Por pas disa minutash u informuam se situata ishte e sigurt dhe mund të vazhdonim”, tha ai.
Ministri i Jashtëm ukrainas Andrii Sybiha tha se “sulmet barbare” në kufirin Ukrainë-Poloni në Yahodyn përbënin “terrorizmin e Putinit që po ‘troket’ drejtpërdrejt në dyert e BE-së dhe NATO-s”, dhe përsëriti thirrjet për më shumë sanksione ndaj Moskës.
“Putini duhet ta kuptojë se barbarizmi i tij do të përballet me një veprim vendimtar që rrit koston e luftës për të deri në një nivel të papranueshëm. Kjo është e vetmja mënyrë për ta ndaluar atë”, tha ai.
Rusia ka kryer muajt e fundit një sërë sulmesh vdekjeprurëse ndaj trenave të Ukrainës, depove hekurudhore dhe objekteve të tjera të transportit.
Në fillim të këtij muaji, gjashtë punonjës të kompanisë shtetërore hekurudhore Ukrzaliznytsia u vranë pasi një depo u godit në Kyiv.
Këtë javë, një kontrollore treni humbi jetën në një sulm rus me dron ndaj një treni pasagjerësh në jug të Ukrainës.
Në janar, presidenti Volodymyr Zelensky dënoi si “terrorizëm” një sulm rus ndaj një treni pasagjerësh të mbushur me njerëz në rajonin verilindor të Kharkivit, i cili la pesë persona të vrarë.
Sulmet ruse kanë dëmtuar rëndë rrjetin e gjerë hekurudhor të Ukrainës, i cili është mënyra kryesore e transportit për miliona ukrainas, pasi të gjitha udhëtimet ajrore janë pezulluar që nga fillimi i pushtimit në shkallë të plotë të Rusisë në vitin 2022.