Mijëra persona kanë protestuar të shtunën në Madrid, duke shprehur pakënaqësi ndaj mënyrës se si qeveria spanjolle ka menaxhuar krizën e migracionit në Ceuta.
Ata kërkuan dorëheqjen e kryeministrit Pedro Sanchez dhe mbajtjen e zgjedhjeve të reja.
Protesta, e quajtur “Marshi II për Dinjitet: Në mbrojtje të Spanjës”, u organizua nga platforma Sociedad Civil Espanola. Organizatorët kanë kërkuar që zgjedhjet e përgjithshme të mbahen para 15 nëntorit.
Protesta vjen pas një fluksi masiv migrantësh në Ceuta, territorin spanjoll në Afrikën e Veriut. Në fund të korrikut, rreth 72 mijë persona hynë në territor nga Maroku fqinj, kryesisht përmes detit.
Sipas qeverisë spanjolle, shumica e tyre u kthyen ose u dërguan sërish përtej kufirit, ndërsa rreth 5 mijë persona, përfshirë rreth 1,200 të mitur, mbetën në Ceuta. Autoritetet lokale kanë raportuar shifra më të larta.
Ende nuk është bërë plotësisht e qartë se çfarë e shkaktoi hyrjen masive të migrantëve. Qeveria spanjolle ka thënë se dyndja u nxit edhe nga një fushatë në rrjetet sociale.
Fluksi i papritur i dhjetëra mijëra njerëzve ushtroi presion të madh mbi burimet e Ceutas, qytet me rreth 84 mijë banorë, dhe shkaktoi pakënaqësi të madhe te një pjesë e banorëve.
Autoritetet lokale kanë akuzuar qeverinë qendrore se kishte shpërfillur shenjat paralajmëruese para se të ndodhte kalimi masiv i kufirit.
Kjo ishte protesta e dytë e organizuar me kërkesa të ngjashme, ndërsa protestuesit përsëritën thirrjen për dorëheqjen e Sanchezit dhe mbajtjen e zgjedhjeve të parakohshme.