Macron critique les commentaires des dirigeants étrangers sur les manifestations en France

Presidenti francez, Emmanuel Macron, ka deklaruar se ishte i frustruar nga “manipulimi i informacionit” lidhur me ngjarjet në Francë, të cilat, sipas tij, ishin “të papranueshme dhe të pamenduara mirë nga shumë palë, përfshirë edhe liderë të huaj”.

“Për shembull, pamë imazhe të krijuara nga inteligjenca artificiale, që paraqisnin skena të cilat nuk kishin ndodhur kurrë në të vërtetë në Francë. Disa madje pretenduan se vendi ishte pushtuar nga turma migrantësh dhe islamistësh, gjë që është krejtësisht e pavërtetë”, ka thënë Macroni të mërkurën, duke folur nga Doha ku po qëndron për një vizitë zyrtare.

Presidenti amerikan, Donald Trump, e ka sugjeruar këtë në mënyrë të përsëritur dhe disa liderë të BE-së kanë bërë komente të ngjashme, duke i lidhur protestat me migracionin, përfshirë kryeministrin e Hungarisë, Peter Magyar dhe kryeministrin e Polonisë, Donald Tusk.

Macroni ka thënë se ishte veçanërisht i irrituar nga liderët politikë, “qoftë në rajonin tonë, qoftë në anën tjetër të Atlantikut, të cilët përsërisin me naivitet pretendime të krijuara nga inteligjenca artificiale ose përforcojnë narrativa që qarqe të caktuara dëshirojnë t’i përhapin”.

“Është e qartë se ata po bëjnë fushatë në kurriz tonin”, ka deklaruar Macroni.

Ai ka shtuar se këto komente “tregojnë se kush e do Francën dhe kush jo”.

Macroni ka njoftuar se, pas kthimit të tij të enjten, do të zhvillojë një takim me ministrat dhe zyrtarët e inteligjencës, për të marrë një “raport të detajuar” mbi atë që ka ndodhur dhe mbi përgatitjet për protestat e reja të kësaj fundjave.