Kanadaja vendos tarifa hakmarrëse deri në 50% ndaj qindra produkteve të SHBA-së

Kanadaja ka njoftuar tarifa hakmarrëse ndaj mallrave amerikane me vlerë 27.6 miliardë dollarë kanadezë, duke iu përgjigjur “dollar për dollar” tarifave të reja të vendosura nga Uashingtoni zyrtar ndaj produkteve kanadeze.

Qeveria e Kanadasë ka njoftuar gjithashtu një paketë mbështetëse financiare për bizneset dhe punëtorët kanadezë të prekur nga përshkallëzimi i luftës tregtare.

Tarifat kundërpërgjigjëse do të hyjnë në fuqi më 8 shtator dhe do të vendosin detyrime prej 15%, 25% dhe 50% për rreth 700 produkte të importuara nga SHBA-ja, thuhet në një deklaratë të qeverisë.

Për të mbështetur punëtorët dhe sektorët e prekur, Kanadaja ka njoftuar një paketë prej 7.5 miliardë dollarësh kanadezë, me masa të reja dhe të zgjeruara, duke përfshirë mbështetje për bizneset e vogla dhe të mesme dhe ndihmë për punëtorët që mund të preken nga tarifat e reja.

Që nga e shtuna, tarifat e reja prej 50% të presidentit Donald Trump ndaj importeve kanadeze me vlerë 20 miliardë dollarë kanë hyrë në fuqi, pasi bisedimet mes dy vendeve për shmangien e tyre kanë dështuar.

Tarifat e reja reciproke shënojnë një pikë të re të ulët në marrëdhëniet Kanada-SHBA.

“Tarifat tona hakmarrëse dollar për dollar dhe normë për normë, së bashku me paketën e mbështetjes prej miliarda dollarësh, do të mbrojnë punëtorët, fermerët, familjet dhe bizneset”, ka thënë ministri kanadez i Financave, François-Philippe Champagne.

aussi LE MONDE 3o. avant Trump affirme qu'il changera le nom du lac Ontario en « Lac Amérique ».

Tarifat e reja janë hartuar në mënyrë të tillë që ndikimi mbi konsumatorët dhe bizneset kanadeze të jetë minimal, por ato mund të godasin gjithashtu ekonominë amerikane, ka thënë një zyrtar qeveritar.

Tarifat prej 50% do të aplikohen ndaj disa sektorëve të rëndësishëm, si çeliku, alumini, mobiliet dhe veshjet. 

Tarifat prej 25% do të vendosen ndaj djathit, pajisjeve elektroshtëpiake dhe disa produkteve të detit, ndërsa ato prej 15% do të aplikohen ndaj pajisjeve elektronike dhe veglave, ka thënë zyrtari.