L'Europe occidentale bat un record de température

Dy muajt e parë të verës në Evropën Perëndimore kanë qenë më të nxehtët e regjistruar ndonjëherë, ka njoftuar të hënën monitoruesi klimatik i Bashkimit Evropian, ndërsa kontinenti përballet me zjarre shkatërruese dhe përgatitet për një tjetër valë të nxehti.

Temperatura mesatare për muajt qershor dhe korrik ishte 21,62 gradë celsius, rreth 2,79 gradë më e lartë se mesatarja, duke tejkaluar rekordin e mëparshëm të temperaturës, të vendosur në vitin 2022, ka njoftuar Shërbimi i Ndryshimeve Klimatike “Copernicus”.

Korriku ishte gjithashtu muaji më i nxehtë i regjistruar ndonjëherë për oqeanet e botës jashtë zonave polare, sipas Copernicus, ndërsa temperatura rekord u regjistruan në Atlantik dhe në Mesdheun perëndimor, duke vënë në rrezik jetën detare dhe komunitetet bregdetare. Kushtet u ndikuan pjesërisht nga i ashtuquajturi fenomen klimatik “Super El Nino”, që po zhvillohet në Paqësor.

Kontinenti është goditur nga një varg valësh vdekjeprurëse të të nxehtit, ndërsa për këtë javë parashikohen sërish temperatura të larta. Sipas të dhënave të përpiluara nga Bloomberg, temperaturat e larta kanë shkaktuar më shumë se 25.000 vdekje në të gjithë Evropën këtë vit.

Evropa është kontinenti që po ngrohet më shpejt në botë, por është veçanërisht i papërgatitur për t’i përballuar temperaturat e larta, për shkak të infrastrukturës së vjetër dhe mungesës së sistemeve të ajrit të kondicionuar.

aussi LE MONDE 29 mai 2026 L'Europe est en proie à une forte chaleur, un record est battu au Portugal

Temperaturat përvëluese dhe thatësirat e vazhdueshme në qershor dhe korrik e kanë përforcuar njëra-tjetrën, duke krijuar një spirale të motit të nxehtë, sipas Samantha Burgess, drejtueses strategjike për klimën në Qendrën Evropiane për Parashikimet e Motit në Afat të Mesëm.

“Ndërsa tokat thahen, ato humbasin aftësinë për të siguruar ftohje natyrore, duke bërë që nxehtësia të grumbullohet më lehtë”, ka thënë Burgess, duke shtuar se ky ishte “një shembull i qartë se si ndryshimet klimatike po i përkeqësojnë ekstremet e temperaturave”.

Shkencëtarët zbuluan gjithashtu se nivelet e lagështisë në sipërfaqen e tokës në Evropën Perëndimore në korrik 2026 ishin “dukshëm më të ulëta” se në korrik 2022, vera e fundit kur rajoni përjetoi thatësirë ekstreme. Në Francë, Spanjë dhe në disa pjesë të Gjermanisë dhe Mbretërisë së Bashkuar u regjistruan “mungesa jashtëzakonisht të mëdha deri në rekorde” të reshjeve dhe lagështisë së tokës.

Nxehtësia rekord e kësaj vere ka krijuar kushtet për zjarret rekord që kanë përfshirë Evropën, duke detyruar qindra mijëra njerëz të zhvendosen dhe duke djegur më shumë se 1,23 milionë hektarë tokë, kryesisht në Spanjë, Francë dhe Itali, sipas një raporti të BE-së të publikuar më 6 gusht.

Përtej tokës së përvëluar, zjarret kanë pasur gjithashtu një ndikim më të gjerë në të gjithë kontinentin, duke rritur emetimet dhe duke përkeqësuar cilësinë e ajrit, sipas Laurence Rouil, drejtoreshë e Shërbimit të Monitorimit të Atmosferës në “Copernicus”.

“Zjarret më të mëdha prodhojnë më shumë tym dhe e çojnë atë më lart në atmosferë, që do të thotë se ai mund të udhëtojë në distanca më të mëdha dhe të ndikojë në cilësinë e ajrit jo vetëm në zonën lokale, por në një rajon shumë më të gjerë”, është shprehur Rouil.

aussi LE MONDE 25 juin 2026 La vague de chaleur qui frappe l'Europe se déplace vers l'est.

Thatësirat e rënda kanë shkaktuar gjithashtu rënien e niveleve të ujit në lumenjtë kryesorë të Evropës, veçanërisht në Senë, Ren dhe Danub, duke kërcënuar furnizimin me energji të kontinentit.

Hungaria dhe Rumania u detyruan të mbyllnin përkohësisht reaktorët bërthamorë që ftohen me ujërat e Danubit, lumit të dytë më të gjatë në Evropë, i cili ka pasur nivele aq të ulëta të ujit saqë kriza mund të vërehet edhe nga hapësira.