Ndërprerjet në përdorimin ushtarak të sistemit satelitor Starlink po vazhdojnë të regjistrohen në Ukrainë, sipas burimeve brenda Ministrisë së Mbrojtjes së Ukrainës, edhe pasi presidenti amerikan Donald Trump deklaroi se Elon Musk i kishte rikthyer shërbimet në gjendjen e mëparshme.
Burimet i thanë BBC-së se po regjistrohen raste kur dronët humbin lidhjen gjatë lëvizjes, duke penguar operacionet ushtarake.
Presidenti amerikan kishte mohuar se e kishte udhëzuar miliarderin e teknologjisë që të kufizonte lidhjen përmes Starshield, versionit të Starlinkut të projektuar për përdorim ushtarak, përpara se të deklaronte të enjten se Musku “e kishte rikthyer”.
Musk kishte thënë më herët se nuk ishte përgjegjës për ngadalësimin e shërbimit, i cili ka ndikuar në aftësinë e Ukrainës për të përdorur dronë sulmues dhe për të koordinuar operacionet mbrojtëse.
Ministria e Mbrojtjes së Ukrainës deklaroi se “aktualisht nuk ka konfirmim se kufizimet janë hequr”.
Musk pati deklaruar se Starshield, të cilin Ukraina e përdor për disa nga operacionet e saj, kontrollohej nga ushtria amerikane dhe la të kuptohej se Pentagoni mund të qëndronte pas problemeve. Që atëherë, Shtëpia e Bardhë ka mohuar vazhdimisht se ka vendosur qëllimisht kufizime në rrjetin në Ukrainë.