Ka filluar ekzekutimi i mjeteve për subvencionimin e librave shkollor. Ministria e Arsimit dhe Shkencës edhe këtë vit ka vendosur të subvencionojë prindërit për blerjen e librave shkollor për fëmijët.
Viti shkollor nis më 1 shtator, ndërsa Ministria e Arsimit ka publikuar vetëm të enjten katalogun e librave për vitin shkollor 2026/27.
Ka pasur kritika të shumta nga deputetë të ish-partive opozitare për vonesat në publikimin e katalogut dhe transferimin e mjeteve te llogaritë e prindërve.
“Vetëm pesë ditë deri më 1 shtator! Prindërit ende nuk i kanë marrë mjetet nga MASHT-i për blerjen e librave. Për më tepër, ministri u ka thënë prindërve: mos i bleni librat, sepse jemi duke negociuar çmimet me shtëpitë botuese. Tash, kur kanë mbetur vetëm pesë ditë deri më 1 shtator, qëllojani se pozita e kujt është forcuar në këto negociata. Mos të harrojmë se ka komuna që nuk kanë as librari. E prindërit e dinë shumë mirë çka heqin çdo vit t'i gjejnë të gjitha librat, sepse shtëpitë botuese si biznese private që janë i shtypin librat bazuar në kërkesë. Amatera! Një prej gjërave që ka funksionuar mirë në arsim ka qenë pikërisht furnizimi i nxënësve me libra edhe këtë e përmbyset”, shkroi deputetja e LDK-së, Hykmete Bajrami, të mërkurën.