Pas afër shtatë muajsh, dyert e Tetarit Kombëtar të Kosovës u rihapën sërish.

Megjithëse jo me kapacitet të plotë aq sa ofron salla e madhe e Teatrit, publiku i është rikthyer këtij arti mbrëmjen e 5 tetorit.

Nën masat e reja të qeverisë, vetëm dyzet për qind e ulëseve u zunë nga spektatorët që duke ndjekur rregullat anti-COVID-19, ata ndoqën premierën e shfaqjes muzikore “Zgjimi i Pranverës”, me regji të Zana Hoxhës.

Kryevepra e dramaturgut gjerman, Frank Wedekind, u shfaq për herë të dytë në skenën e TKK-së, pasi që premiera e mbyllur ishte prezantuar më 12 qershor, në njëzet e një vjetorin e çlirimit të Prishtinës.

Preokupimet që i kanë përcjellë të rinjtë e Kosovës gjatë viteve ’90, janë elementet e kësaj shfaqjeje e cila tutje tregon edhe për epokën e solidaritetit që mbante gjallë frymën e rezistencës kolektive.

Aktorët u shprehën të lumtur që pas gjysmë viti janë përballë publikut, teksa thonë se kjo shfaqje diskuton për tema të ndaluara të një shoqërie patriarkale.

“Zgjimi i Pranverës”, që është një bashkëpunim i Teatrit Kombëtar të Kosovës dhe Qendrës për Art dhe Komunitet – Artpolis, në shtator është shpërblyer me çmimin kryesor në Festivalin ndërkombëtar të teatrit në Shkup.

Regjisorja Zana Hoxha deklaroi se shfaqja u dedikohet të gjithë adoleshentëve të rënë në luftën e fundit në Kosovë.

Pas premierës në TKK, “Zgjimi i pranverës” do të prezantohet në Gjilan, Gjakovë dhe Prizren.