-
Traducido por: Vita Abrashi-Kajtazi
- 3 de septiembre de 2026 14:27
- Compartir a:
Aktori i njohur, George Clooney, shfrytëzoi ceremoninë e Festivalit të Filmit në Venecia për të kritikuar autoritarizmin, duke bërë thirrje për më shumë bashkim, art dhe liri të shprehjes, ka shkruar MujerPrimero.
Aktori 65-vjeçar u nderua të mërkurën me “Golden Lion” për Arritje Jetësore, një prej çmimeve më prestigjioze të festivalit.
Gjatë fjalimit, Clooney foli për një periudhë ku, sipas tij, njerëzit me më shumë pushtet dhe para po përpiqen t’i bëjnë njerëzit të kenë frikë nga njëri-tjetri.
“Po jetojmë një moment ku njerëzit në pushtet, ata që kanë më shumë para, po na thonë të kemi frikë nga njëri-tjetri. Por ne e dimë më mirë se kaq, apo jo? Sepse historia na mëson diçka”, ka thënë ai.
Clooney ka theksuar se ndër njerëzit e parë që përpiqen të heshten nga regjimet autoritare janë gazetarët dhe artistët.
“Njerëzit e parë që autoritarët përpiqen t’i mbyllin në heshtje nuk janë politikanët. Janë gazetarët që bëjnë pyetje. Janë artistët që refuzojnë përgjigjet e thjeshta; regjisorët, shkrimtarët, aktorët dhe muzikantët që këmbëngulin se edhe dikush që nuk e ke takuar kurrë meriton empatinë tënde”, u shpreh ai.
Sipas aktorit, historitë që tregohen përmes artit mund të jenë të rrezikshme për ata që përhapin frikë.
“Historitë janë gjithmonë të rrezikshme për njerëzit që ushqehen me frikë. Njerëzit që kanë frikë nga librat, muzika dhe historitë nuk janë kurrë heronjtë e historisë”, ka thënë Clooney.
Ai ka pranuar se filmat nuk mund t’i ndalin luftërat, të ulin inflacionin apo të rregullojnë zgjedhjet, por beson se arti mund të ndryshojë mënyrën se si njerëzit e shohin njëri-tjetrin.
“Ata na kujtojnë se një i panjohur nuk është kurrë thjesht një i panjohur dhe se ai mund të jetë heroi në historinë e dikujt tjetër”, ka thënë ai.
Në fund, ai ka falënderuar publikun për mbështetjen dhe ka theksuar rëndësinë e dashurisë, respektit dhe vendosmërisë për të kaluar së bashku periudhat e vështira.
Clooney e nisi fjalimin me humor, duke bërë shaka për faktin se po merrte një çmim për arritje jetësore.
“Kur të thonë se do të marrësh një çmim për arritje jetësore, të vijnë në mendje vetëm dy gjëra. E para: ‘Çfarë nderi i jashtëzakonshëm është ky’. Pastaj e dyta: ‘A dinë ata diçka që unë nuk e di? Mos kanë folur me mjekët e mi?’”, ka thënë ai duke shkaktuar të qeshura.
Aktori ka falënderuar gjithashtu bashkëshorten e tij, Amal Clooney, duke thënë se e ka të vështirë të gjejë fjalët për të përshkruar dashurinë dhe krenarinë që ndien për të.
Me humor, ai ka shtuar se binjakët e tyre 9-vjeçarë, Ella dhe Alexander, janë dy personat e vetëm që menduan se ai ishte i mirë në filmin “Batman”.
Fjalimin e Clooneyt e prezantoi aktorja Laura Dern, bashkëprotagoniste e tij në filmin “Jay Kelly”, ndërsa mesazhe urimi për të u lexuan edhe nga miqtë dhe bashkëpunëtorët e tij, përfshirë Brad Pitt, Adam Sandler dhe Steven Soderbergh.