Pio Espositos i është bashkuar vëllai më i madh, Sebastiano, në përbërjen bazë të Italisë për ndeshjen e Ligës së Kombeve ndaj Turqisë, të hënën mbrëma. Ishte hera e parë që dy vëllezër startuan për “Azzurët” pas më shumë se një shekulli.
Ishte debutim ndërkombëtar për 24-vjeçarin Sebastiano Esposito. Ndërkohë 21-vjeçari Pio kishte dhjetë ndeshje për Italinë dhe pesë gola. Pio shtoi një tjetër gol dhe një asistim në fitoren dominante, 4:1, të Italisë në Turqi. Sebastiano po ashtu iu afrua golit disa herë.
“E mbaj mend shumë mirë ndeshjen e parë me Italinë, pasi ishte vetëm vitin e kaluar. Kështu që nuk kam dashur të bëjë më shumë presion ndaj tij. Shpresoj se e ka shijuar maksimalisht”, ka thënë Pio Esposito.
“Ishte vërtetë e shkëlqyer ta ndaj këtë përvojë me të. Shpresoj se do ta bëjmë këtë shumë herë të tjera”.
Ata janë bërë vëllezërit e katërt që kanë luajtur në të njëjtën ndeshje për Italinë, duke përfshirë Filippo dhe Simone Inzaghin në vitin 2000. Por për herë të fundit dy vëllezër kanë startuar në një ndeshje për Italinë në vitin 1915. Aldo dhe Luigi Cevenini shënuan të gjithë golat në fitoren 3:1 ndaj Zvicrës.
Për më tepër, Sebastiano u bë i treti i vëllezërve Esposito që luajti për Italinë. Salvatore Esposito, që është i madhi i vëllezërve dhe i ka 25 vjet, luajti një ndeshje në vitin 2022. Është hera e parë që tre vëllezër luajnë për Italinë në nivelin e të rriturve.
Pio shpërtheu me Interin në edicionin e kaluar. Sebastiano iu bashkua Sassuolos në huazim nga Cagliari në verë.
Në ndeshjen në Bursa, të luajtur para 34 mijë shikuesve, Italia u përmirësua ndjeshëm në krahasim me ndeshjen e parë të Ligës së Kombeve. Më 25 shtator, Italia humbi 2:0 në Romë nga Belgjika. Kishte kritika të mëdha për italianët më pas. Por ndaj Turqisë, italianët kishin paraqitje dominuese. Alessandro Bastoni shënoi që në minutën e nëntë. Davide Frattesi shtoi gol tjetër në minutën e 22-të, ndërsa Michael Kayode shënoi në minutën e 27-të. Esposito realizoi në minutën e 50-të.
Italia është duke bërë përpjekje për kthim në rrugën e sukseseve. Më 2 tetor do të ketë sfidë të vërtetë, do të përballet me Francën në udhëtim.