Eksperti i marrëdhënieve ndërkombëtare, Blerim Vela, e ka cilësuar si “gjysmak” vendimin e Gjykatës Kushtetuese, e cila ka konstatuar se konstituimi i Kuvendit dhe formimi i Qeverisë “Kurti 4” nuk janë në kundërshtim me Kushtetutën.
Vela ka thënë se ky vendim është vazhdimësi e logjikës së vendimeve të mëparshme të Kushtetueses.
“Sa i përket frymës së këtij vendimi konsideroj se është vazhdimësi e qasjes së Gjykatës Kushtetuese që ka trajtuar raste të ngjashme. Paraqet një mbindërtim kushtetues dhe është vazhdim i logjikës së asaj anomalisë kushtetuese të vendimit të vitit 2010. Sa i përket përmbajtjes janë dy elemente, e para është vendim gjysmak sepse nuk ka trajtuar veprimet e Kuvendit pas afatit 30 ditor nga certifikimi i rezultateve të zgjedhjeve. Në anën tjetër e kemi logjikën e njëjtë të improvizimit të mekanizmave zhbllokues”, ka thënë ai në “Interaktiv”.
Vela ka paralajmëruar se mund të krijohen bllokada të reja politike në të ardhshmen, pasi ka theksuar se vendimi i fundit i gjykatës nuk ofron zgjidhje të qëndrueshme për skenarë të ngjashëm.
“E konsideroj vendim gjysmak sepse mund të jemi në situatë tjetër po qe se pas zgjedhjeve të tjera, ta zëmë forcat në Kuvend janë të tilla 51 për një parti a koalicion dhe 49 për një tjetër dhe nuk ekziston një shumicë që formon qeverinë... Si vendim ndoshta në afat të shkurtër ka dhënë zgjidhje”, u shpreh ai.
Vendimi i Kushtetueses erdhi pas kërkesave të parashtruara nga Partia Demokratike e Kosovës (PDK), e cila kishte kontestuar konstituimin e Kuvendit dhe formimin e Qeverisë. Në vendimin e saj, Kushtetuesja ka konstatuar se Kuvendi është konstituuar pas skadimit të afatit prej 30 ditësh. Megjithatë, sipas Gjykatës, kalimi i këtij afati ka pasojë fillimin e rrjedhjes së afateve kushtetuese për zgjedhjen e presidentit, në rastin kur posti është vakant, si dhe për formimin e Qeverisë.
Gjykata ka konstatuar se afati 60-ditor për zgjedhjen e presidentit ka filluar më 8 gusht 2026 dhe përfundon më 6 tetor 2026.
Në të njëjtin vendim, Kushtetuesja ka vlerësuar se deputetët duhet, sa më parë, të zgjedhin edhe nënkryetarin e Kuvendit nga radhët e grupit të dytë më të madh parlamentar, që është Partia Demokratike e Kosovës (PDK).
Më 13 shtator, në mungesë të deputetëve të PDK-së dhe Aleancës, deputetët e Lëvizjes Vetëvendosje, Lidhjes Demokratike të Kosovës dhe përfaqësuesit e komuniteteve joshumicë votuan për konstituimin e Kuvendit, por pa zgjedhur nënkryetarin nga radhët e PDK-së.
Më vonë gjatë së njëjtës ditë, Kuvendi votoi edhe Qeverinë e re, të udhëhequr nga Albin Kurti.