-
Translated by: Blerta Haxhiu
- 6 October 2026 14:01
- Share to:
Forcat ushtarake të Jemenit, të mbështetura nga Arabia Saudite, kanë njoftuar se kanë vënë nën kontroll ngushticën Bab al-Mandab, në skajin jugor të Detit të Kuq, raporton BBC.
Njoftimi vjen në nisje të një ofensive të gjerë kundër rebelëve Huthi, të mbështetur nga Irani.
Ushtria jemenase bëri të ditur gjithashtu se forcat e saj kanë marrë nën kontroll qytetin bregdetar të Mokhas, me mbështetjen e sulmeve ajrore saudite.
Megjithatë, burime qeveritare dhe ushtarake jemenase thanë më vonë për Reuters dhe AFP se trupat kishin arritur vetëm në periferi të qytetit.
Huthit i kanë mohuar të dyja pretendimet, duke thënë se nuk e kanë humbur kontrollin mbi Bab al-Mandabin apo Mokhan. Ata deklaruan se, në kundërpërgjigje të sulmeve ajrore saudite, kanë goditur aeroportin e Riadit dhe objektiva të tjera në Arabinë Saudite.
Riadi i dënoi sulmet dhe përsëriti thirrjen ndaj anëtarëve të përhershëm të Këshillit të Sigurimit të OKB-së që të mbështesin qeverinë e Jemenit, të njohur ndërkombëtarisht.
Ndërkohë, Turqia dhe Pakistani, aleatë të Arabisë Saudite, zhvilluan një takim urgjent në Riad dhe ranë dakord për dërgimin e shpejtë të forcave ushtarake në Arabinë Saudite, në kuadër të Marrëveshjes së Përbashkët të Mbrojtjes së Mekës, sipas Ministrisë së Jashtme pakistaneze.
Sekretari i Përgjithshëm i OKB-së, António Guterres, dënoi sulmet e vazhdueshme ndërkufitare të Huthive ndaj Arabisë Saudite dhe shprehu shqetësim të thellë për përshkallëzimin e luftimeve.