Presidenti rus, Vladimir Putin, ka thënë se zhvillimet e fundit në Evropë, përfshirë fitoren e së djathtës ekstreme në zgjedhjet në një nga landet gjermane, janë rezultat i gabimeve sistematike të elitave perëndimore.
Duke folur për gazetarët në ditën e parë të vizitës së tij në Indi, Putin ka thënë se nuk dëshironte të komentonte drejtpërdrejt fitoren e thellë të partisë Alternativa për Gjermaninë (AfD) në Saksoni-Anhalt, por më pas fajësoi elitat perëndimore për zhvillimet politike në kontinent.
“Gjithçka që po ndodh aktualisht në Evropë është në thelb rezultat i gabimeve sistematike të të ashtuquajturit Perëndim, të globalistëve perëndimorë në politikë, siguri dhe ekonomi”, ka thënë Putin.
Sipas tij, vendet perëndimore kanë injoruar kundërshtimin e Rusisë ndaj zgjerimit të NATO-s drejt lindjes.
Putini pretendoi se pas largimit nga pushteti të presidentit pro-rus të Ukrainës në vitin 2014, Perëndimi kishte vendosur si synim anëtarësimin e Ukrainës në NATO. Sipas tij, kjo përfundimisht u bë shkaku kryesor i luftës së sotme në Ukrainë.
“Elitat globaliste perëndimore janë fajtore për këtë, megjithëse vazhdimisht përpiqen të na e hedhin fajin neve. Mendoj se njerëzit në Evropë e kuptojnë se çfarë po ndodh. Prandaj kemi këto rezultate në Gjermani dhe këto tendenca në Evropë në përgjithësi”, deklaroi ai.
Presidenti rus u shpreh gjithashtu se vendet perëndimore po i frikësojnë qytetarët e tyre me një “kërcënim të rremë nga Rusia”, për të cilin pretendon se ekziston që nga koha e Bashkimit Sovjetik.
“Por një kërcënim i tillë nuk ekziston dhe nuk ka ekzistuar kurrë”, shtoi Putin.
Putin pritet të marrë pjesë në samitin e BRICS-it në Indi, së bashku me presidentin kinez Xi Jinping dhe presidentin iranian Masoud Pezeshkian.
Në zgjedhjet e së dielës së kaluar në Saksoni-Anhalt, AfD-ja doli e para, duke bërë fushatë kundër migrimit dhe për rikthimin e marrëdhënieve më të afërta me Moskën. Për të formuar qeverinë në atë land, partisë tani i duhet të sigurojë mbështetje nga deputetë të partive të tjera ose të arrijë marrëveshje me partinë e vogël të së majtës ekstreme, BSW.