-
Translated by: Flutura Gashi-Mehmeti
- 20 October 2026 15:01
- Share to:
Ora policore gjatë natës në zonat e prekura nga dhuna në qytetet më të mëdha të Francës ka ndihmuar në qetësimin e situatës pas trazirave më të rënda në vend prej vitesh, ka thënë qeveria, në prag të protestave të tjera të planifikuara për fundjavën.
Të nxitura nga protestat në Francë, turma njerëzish kanë dalë në rrugë edhe në vende të tjera, përfshirë Italinë dhe Shqipërinë, ku pakënaqësia e ngjashme për kushtet e jetesës ka çuar në përplasje.
Pas dhunës së fundjavës, qeveria franceze u përpoq të siguronte opinionin publik se kishte nxjerrë mësime nga mangësitë në siguri, të cilat bënë që qendrat e qyteteve si Parisi, Marseja dhe Lioni të mbeteshin kryesisht të pambrojtura ndaj protestuesve të dhunshëm dhe plaçkitësve që u vunë në lëvizje pas demonstratave.
“Orët policore të vendosura në zona të caktuara kanë ndihmuar në ruajtjen e qetësisë gjatë natës së kaluar”, ka shkruar kryeministri Sebastien Lecornu në një postim në X, duke shtuar se ato mund të zgjaten edhe gjatë javës, aty ku do të jetë e nevojshme.
Në qendër të Parisit, policia ka zbrazur dhe ruajtur gjatë natës sheshin Place de la Republique, ndërsa një helikopter fluturonte mbi të. Në Lilë, në veri të vendit, ku ora policore zbatohej vetëm për të miturit, policët patrulluan qendrën e qytetit dhe kontrolluan kalimtarët.
Kryetari i bashkisë së Marsejës, Benoit Payan, ka thënë se nga e marta në mbrëmje do të vendoseshin orë policore për të miturit në zonat tregtare që u goditën më rëndë nga trazirat e fundjavës.
Grevat dhe demonstratat e nxënësve të shkollave të mesme kundër rënies së cilësisë dhe përkeqësimit të kushteve në arsim janë ndërthurur me një valë më të gjerë pakënaqësie për rritjen e çmimeve dhe ndjesinë se nevojat për shëndetësi, strehim dhe mirëqenie sociale nuk po plotësohen më.
Ministri i Drejtësisë, Gerald Darmanin, i ka thënë televizionit BFM se 149 personat e ndaluar gjatë fundjavës po mbaheshin në paraburgim në pritje të gjykimit. Në një dalje tjetër televizive të hënën në mbrëmje, ai ka thënë se rreth 2.500 persona të tjerë vazhdojnë të mbahen në polici për t’u marrë në pyetje.
Trazirat kanë shtuar tensionet në skenën politike, gjashtë muaj para zgjedhjeve presidenciale, ku, sipas sondazheve, kandidatët e së djathtës ekstreme dhe të së majtës radikale kryesojnë garën.