Ministri izraelit i Sigurisë Kombëtare, Itamar Ben-Gvir, ka publikuar një video në të cilën shihet duke kërcënuar se do të vrasë zyrtarin e lartë të Hamasit, Hassan Salameh.
Salameh po vuan disa dënime me burgim të përjetshëm për rolin e tij në një seri sulmesh të organizuara nga Hamasi në vitin 1996, përfshirë shpërthime në autobusë.
Komisioni Palestinez për Çështjet e të Burgosurve dhe Ish-të Burgosurve ka dënuar ministrin Ben-Gvir, të krahut të djathtë, pasi ai publikoi pamjet në rrjetet sociale.
“Pamjet e publikuara nga Ben-Gvir tregojnë se poshtërimi dhe degradimi kanë arritur nivelet më të larta”, ka thënë Raed Abu al-Hummus, kreu i agjencisë së Autoritetit Palestinez, në një deklaratë të hënën.
Kushtet brenda burgjeve izraelite janë “terrorizëm i organizuar”, ka shtuar ai.
Ben-Gvir ka publikur të dielën në X një video, të shoqëruar me një postim të gjatë, ku shihet brenda qelisë së Salamehut, i cili është i burgosur nga Izraeli prej 30 vjetësh.
“Dua të të vras. ... Dua që të ekzekutohesh”, i ka thënë ai Salamehut, ndërsa ishte i rrethuar nga forcat izraelite të sigurisë. Sipas Ben-Gvir, videoja është xhiruar dy javë më parë.
Zyra Mediatike e të Burgosurve Palestinezë i ka quajtur veprimet e Ben-Gvir “një spektakël të lirë politik dhe elektoral”, të realizuar përpara zgjedhjeve të 27 tetorit në Izrael, si dhe “një akt frikacak ngacmimi ndaj një të burgosuri të pambrojtur dhe të prangosur”.
Zyra ka shtuar se autoritetet izraelite mbajnë përgjegjësi të plotë për jetën e Salamehut.
Grupi palestinez Hamas ka thënë se kërcënimi i Ben-Gvir ndaj Salamehut “sinjalizon krime të reja” kundër të burgosurve palestinezë, duke u zotuar se do të vazhdojë përpjekjet për të siguruar lirimin e tyre.
Videoja e Ben-Gvir, në të cilën ai përsëriti gjithashtu thirrjet e tij për ekzekutimin e të burgosurve palestinezë, vjen pas incidenteve të tjera të fundit në të cilat ai ka kërcënuar drejtpërdrejt të burgosur palestinezë, duke nënvizuar retorikën e tij nxitëse dhe politikat e ashpra ndaj palestinezëve të mbajtur në burgjet izraelite.
Në gusht, Ben-Gvir ka publikuar një video ku shihej duke hyrë në qelitë e grave palestineze të burgosura dhe duke u mburrur për kushtet e papërshtatshme në të cilat ato mbaheshin.
Knesseti i Izraelit ka miratuar në mars një ligj që lejon dënimin me vdekje për të burgosurit palestinezë në raste të caktuara, një masë e mbështetur fuqishëm nga Ben-Gvir dhe partia e tij, Fuqia Hebraike.
Ligji nuk parashikon dënimin me vdekje për izraelitët hebrenj.
Legjislacioni ka shkaktuar kritika të gjera dhe protesta nga vendet e rajonit për shkak të pasojave që mund të ketë për të burgosurit palestinezë.
Ben-Gvir ka thënë më parë se partia Fuqia Hebraike do të kërkonte portofolet e mbrojtjes dhe drejtësisë si kusht për t’iu bashkuar një qeverie të ardhshme.
Të dielën, Ben-Gvir ka bërë gjithashtu thirrje për “emigrimin” e palestinezëve nga Gaza dhe Bregu Perëndimor i pushtuar.
Në korrik, Ben-Gvir ka prezantuar një plan shtatëvjeçar, të quajtur “Disengagement 710”, për largimin e rreth dy milionë banorëve të Gazës, përmes asaj që ai e ka quajtur “emigrim vullnetar”.Ben-Gvir ka shtuar se, nëse rizgjidhej, do të krijonte një ministri të migracionit për të dëbuar palestinezët.
Në korrik, anëtarë të kabinetit izraelit dhe deputetë, përfshirë Ben-Gvirin, iu bashkuan një marshimi drejt Gazës për të kërkuar rindërtimin e vendbanimeve hebraike në territorin palestinez të rrethuar.
Ministri izraelit ka shtyrë gjithashtu përpara planet për aneksimin e një pjese të madhe të territorit palestinez të pushtuar, pavarësisht dënimit nga liderët evropianë dhe arabë.
Këtë vit, Ben-Gvir ka miratuar dhënien e lejeve për armë zjarri për izraelitët në 18 vendbanime të tjera në territorin palestinez të pushtuar, të cilat janë të paligjshme sipas së drejtës ndërkombëtare.