Irani tha të dielën se ka goditur një mjet lundrues pa pilot të SHBA-së, i cili po përpiqej të hynte në Ngushticën e Hormuzit, në incidentin më të fundit në përshkallëzimin e ri të luftimeve mes dy vendeve.
SHBA-ja nuk e ka konfirmuar menjëherë sulmin e pretenduar, i cili ndodhi një ditë pasi ushtria amerikane tha se forcat e saj kishin goditur tre cisterna iraniane të naftës, në përgjigje të një sulmi me raketa ndaj anijeve luftarake të Marinës amerikane.
Lufta nisi më 28 shkurt, me sulmet e SHBA-së dhe Izraelit ndaj Iranit. Megjithatë, që nga shpallja e një marrëveshjeje armëpushimi në qershor, luftimet kanë vazhduar herë pas here, ndërsa të dyja palët janë përpjekur t’i shkaktojnë njëra-tjetrës dëme ushtarake dhe ekonomike, në kohën kur negociatat kanë dështuar.
SHBA-ja dhe Irani rifilluan sulmet javën e kaluar, pas një muaji qetësie relative, duke e kthyer sërish Ngushticën e Hormuzit dhe komunitetet iraniane përgjatë saj në objektiva. Të paktën pesë persona u vranë në fillim të javës gjatë një bombardimi amerikan në jug të Iranit.
Administrata Trump duket se ka miratuar një qasje me dy drejtime ndaj konfliktit: duke iu përgjigjur ushtarakisht sulmeve në Ngushticën e Hormuzit dhe njëkohësisht duke goditur institucionet financiare të huaja që menaxhojnë paratë e Iranit.
Ndërkohë, udhëheqësit e rinj të linjës së ashpër në Teheran kanë sinjalizuar se janë të gatshëm të vazhdojnë përballjen, pasi kanë përballuar dekada sanksionesh.
Gjatë viteve, Irani ka gjetur mënyra për t’i anashkaluar sanksionet dhe tashmë edhe bllokadën amerikane, duke vazhduar të eksportojë naftën tek blerësit për të lehtësuar presionet në rritje mbi ekonominë. Një pjesë e këtij mekanizmi mbështetet te një “flotë në hije”, e përbërë nga anije që transportojnë naftën iraniane.