Parlamenti i Iranit ka miratuar të dielën një projektligj që kriminalizon intervistat dhe komunikimet e tjera me mediat e konsideruara armiqësore ndaj Republikës Islamike, përfshirë mediat amerikane ose izraelite, si dhe ato që financohen nga njëri prej këtyre vendeve, ka raprotuar gazeta iraniane Shargh.
Sipas projektligjit, i cili duhet të shqyrtohet nga Këshilli i Gardianëve përpara se të mund të bëhet ligj, intervistat ose pjesëmarrja në diskutime me media të tilla do të ndaloheshin, dhe shkeljet do të dënoheshin me gjashtë muaj deri në dy vjet burgim.
Intervistat me media të tjera të huaja do të kërkonin njoftimin e ministrisë së Inteligjencës, ndërsa kontaktet me ambasadat e huaja, zyrat e organizatave të huaja ose institucione të tjera joiraniane, pa njoftim dhe leje me shkrim nga ministria e Jashtme, do të dënoheshin me gjobë dhe heqje të disa të drejtave sociale.
Projektligji do të ashpërsojë gjithashtu dënimet për krimet ekonomike të kryera nën drejtimin ose mbikëqyrjen e të huajve, do të ndalojë dhënien e informacionit të huajve pa miratimin e ministrisë së Inteligjencës dhe do të kufizojë bashkëpunimin shkencor me institucionet e huaja jashtë një liste të miratuar.
Ai do të parashikojë dënime edhe për propozimet politike ose legjislative të bëra nën drejtimin e shërbimeve të huaja të inteligjencës, nëse ato dëmtojnë sigurinë ose pavarësinë e Iranit, me dënime deri në 30 vjet burgim. Çështjet do të shqyrtoheshin nga Gjykatat Revolucionare.
also
Congress passes measure rebuking Trump's military actions in Iran
Kjo lëvizje nuk është hera e parë që Irani kriminalizon bashkëpunimin me subjekte të huaja. Një ligj i miratuar në vitin 2025, pas një lufte 12-ditore me Izraelin, vendosi dënime më të ashpra për bashkëpunimin e dyshuar me shtetet armiqësore.
Gazetarja iraniane e fotografisë, Yalda Moaiery, është dënuar këtë muaj me 15 vjet burgim në bazë të atij ligji, për akuza që përfshinin dhënien e intervistave për media të konsideruara armiqësore dhe sigurimin e fotografive për organizata të lidhura me SHBA-në dhe Izraelin.
