Mijëra protestues janë arrestuar në New Delhi gjatë demonstratës së fundit për reformën zgjedhore, të udhëhequr nga lëvizja rinore “Buburreca”.
Grupi bëri të ditur se themeluesi Abhijeet Dipke, i cili e nisi lëvizjen në maj pasi Kryetari i Gjykatës së Lartë të Indisë i krahasoi disa të rinj të papunë me “buburreca”, u ndalua me udhëheqës të tjerë menjëherë pas mbërritjes në kryeqytetin indian.
Dhjetëra mijëra policë dhe personel paraushtarakë u vendosën në të gjithë qytetin, shërbimet e internetit u pezulluan në lagjen qendrore të biznesit dhe dhjetëra stacione metroje dhe tregje u mbyllën, ndërsa autoritetet ndërhynë për të ndaluar tubimin e organizuar nga lëvizja “Buburrecat”.
Grupi i cili nuk është i regjistruar si parti politike në Indi po kërkon reforma zgjedhore vetëm disa muaj para zgjedhjeve të rëndësishme shtetërore.
Ai gjithashtu ka kërkuar dorëheqjen e komisionerit të përgjithshëm të zgjedhjeve, Gyanesh Kumar për shkak të akuzave për manipulim të listave të votuesve, të cilat Komisioni Zgjedhor i ka mohuar.
Lëvizja ka planifikuar të mbledhë mijëra njerëz në Jantar Mantar, një vend i caktuar për protesta në New Delhi. Por zona u bllokua nga forcat e sigurisë para se të fillonte demonstrata. Megjithatë, protesta të vogla shpërthyen në pjesë të tjera në qytet, në të cilat protestuesit brohoritën slogane duke kërkuar dorëheqjen e Kumarit.