-
Translated by: Flutura Gashi-Mehmeti
- September 8, 2026 10:26
- Share to:
Një valë sulmesh nga Houthët të martën ndaj Arabisë Saudite ka lënë të plagosur më shumë se 70 persona dhe ka shkaktuar zjarre në disa objekte nafte dhe infrastrukturë shërbimesh në rajonin jugor të mbretërisë, kanë thënë autoritetet.
Ky është një përshkallëzim i madh në konfliktin e rinisur midis aleatit të rëndësishëm të SHBA-së dhe rebelëve të mbështetur nga Irani në Jemen.
Sulmet vijnë pas javësh përplasjesh në rritje midis Houthëve dhe forcave qeveritare të mbështetura nga Arabia Saudite në Jemen, të cilat i kanë dhënë fund armëpushimit katërvjeçar në luftën civile të vendit.
Luftimet kanë vazhduar intensivisht në fronte të ndryshme, përfshirë bregdetin perëndimor të Jemenit, ku forcat qeveritare pretendojnë se kanë arritur fitore territoriale në provincat Hodeida, Taiz dhe Baydah. Houthët kanë ndërmarrë gjithashtu sulme ndaj objekteve të naftës dhe cisternave saudite në Detin e Kuq.
Sulmet e hershme të së martës goditën “objekte civile dhe ekonomike” në qytetet saudite Abha, Jazan, Najran dhe Khamis Mushait, ka thënë në një deklaratë gjeneral-majori Turki al-Malki, zëdhënës i koalicionit të udhëhequr nga Arabia Saudite që lufton në Jemen.
Al-Malki ka thënë se sulmet kanë plagosur 73 persona, përfshirë gra dhe fëmijë. Ai nuk ka dhënë detaje të mëtejshme apo ndarje të hollësishme të shifrave.
Sulmet kanë shkaktuar zjarre në disa objekte nafte dhe infrastrukturë shërbimesh në rajonin jugor të Arabisë Saudite, ka njoftur ministria e Energjisë e mbretërisë.
Operacionet në këto objekte dhe infrastrukturë janë pezulluar përkohësisht, thuhet në deklaratë.
Al-Malki i ka cilësuar sulmet si një “përshkallëzim serioz” dhe një “shkelje flagrante të sovranitetit të mbretërisë, si dhe një kërcënim të drejtpërdrejtë për sigurinë e qytetarëve dhe banorëve të saj”.
Ai është zotuar për hakmarrje, duke thënë se koalicioni i udhëhequr nga Arabia Saudite “do të ndërmarrë të gjitha masat e nevojshme operacionale për të frenuar milicinë terroriste Huthite me vendosmëri të plotë”.
Houthët nuk kanë komentuar sulmet, por kanë thënë se do të publikohej një deklaratë në lidhje me “një operacion ushtarak në shkallë të gjerë” thellë brenda territorit të Arabisë Saudite.