Sekretari amerikan i Mbrojtjes, Pete Hegseth, po krijon një zyrë për çështjet fetare, reforma më e fundit e lidhur me fenë që ai po ndërmerr në Pentagon.
Ai ka thënë se zyra do të ndihmojë në ofrimin e “mbështetjes fetare” dhe do t’i raportojë drejtpërdrejt atij.
“Departamenti ynë po vesh armaturën e plotë të Perëndisë, sepse ndërsa zhvillojmë luftë fizike, të gjithë e dimë se beteja e vërtetë është shpirtërore”, theksoi ai.
Hegseth ka përfshirë bindjet e tij fetare të krishtera ungjillore në mënyrën se si drejton Pentagonin, duke organizuar shërbime të krishtera për punonjësit dhe duke folur shpesh për Shtetet e Bashkuara si një komb të krishterë, raportoi AP.
Zyra për Çështjet Fetare, ose ORA, do të mbështesë drejtuesit fetarë ushtarakë dhe shërbimet fetare “në nivelin më të lartë të Departamentit”, sipas një deklarate të Pentagonit. Ajo nuk do të “detyrojë pjesëmarrjen në aktivitete fetare, nuk do të favorizojë një besim të caktuar dhe nuk do të cenojë të drejtat e personelit të çdo besimi apo të atyre që nuk kanë asnjë besim fetar”.
Agjenci të tjera federale kanë pasur zyra për çështjet fetare ose të bazuara në fe, të cilat u krijuan gjatë presidencës së George W. Bush dhe vazhduan në forma të ndryshme gjatë administratave të Barack Obamës dhe Joe Bidenit. Presidenti Donald Trump krijoi një Zyrë për Besimin në Shtëpinë e Bardhë dhe kishte një nismë të ngjashme edhe gjatë mandatit të tij të parë.
Drejtuesi i zyrës së re ende nuk është emëruar. Një memorandum i Pentagonit thotë se drejtori për çështjet fetare do të koordinojë burimet shpirtërore, përfshirë “mbështetjen për edukimin në shtëpi të bazuar në besim për familjet ushtarake”.
Hegseth gjithashtu ka shtyrë sistemin shkollor të ushtrisë që të përfshijë më shumë lëndë mësimore të ndikuara nga pikëpamjet konservatore dhe të krishtera.
Memorandumi përmend “nisma të bazuara në besim që mbështesin reduktimin e vetëvrasjeve në të gjithë Departamentin”.